កូរ៉េខាងជើង បាញ់មីស៊ីលទាំងព្រឹក, ស៊ីរ៉ែនប្រកាសអាសន្នលាន់ទ្រហឹង លើកោះរបស់ កូរ៉េខាងត្បូង

យោធាកូរ៉េខាងត្បូងបាននិយាយថា ប្រទេសកូរ៉េខាងជើង បានបាញ់មីស៊ីល Ballistic មួយគ្រាប់ចូលទៅក្នុងសមុទ្រ ជិតឆ្នេរភាគខាងកើតរបស់ខ្លួន នៅព្រឹកថ្ងៃពុធទី២ខែវិច្ឆិកានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូរទស្សន៍ YTN បានរាយការណ៍ថា ស៊ីរ៉ែនប្រកាសអាសន្នអំពីការវាយប្រហារតាមផ្លូវអាកាស ត្រូវបានបន្លឺឡើងនៅលើកោះ Ulleung របស់ប្រទេសកូរ៉េខាងត្បូង អំឡុងពេលនៃការបាញ់មីស៊ីល។

ការបាញ់បង្ហោះនេះធ្វើឡើងមួយថ្ងៃ បន្ទាប់ពីទីក្រុងព្យុងយ៉ាង ទាមទារឲ្យសហរដ្ឋអាមេរិក និងកូរ៉េខាងត្បូង បញ្ឈប់សមយុទ្ធយោធាទ្រង់ទ្រាយធំជាបន្ទាន់ ដោយហៅលំហាត់នោះថា ជាការញុះញង់ដែលអាចបង្កឲ្យមានវិធានការឆ្លើយតបកាន់តែមានឥទ្ធិពល។

សហរដ្ឋអាមេរិក និងកូរ៉េខាងត្បូង បានចាប់ផ្តើមសមយុទ្ធដែនអាកាសរួមគ្នាទ្រង់ទ្រាយធំបំផុត កាលពីថ្ងៃចន្ទទី៣១ខែតុលា ដោយយន្តហោះចម្បាំងរាប់រយគ្រឿងមកពីប្រទេសទាំងពីរ បានហាត់ធ្វើការវាយប្រហាររយៈពេល២៤ម៉ោងក្នុងមួយថ្ងៃ។

គួរបញ្ជាក់ថា ប្រទេសកូរ៉េខាងជើង បានបាញ់សាកល្បងមីស៊ីលជាច្រើនគ្រាប់ក្នុងឆ្នាំនេះ ហើយនិយាយថា ការបាញ់បង្ហោះនាពេលថ្មីៗ គឺជាការឆ្លើយតបទៅនឹងសមយុទ្ធរវាងអាមេរិកនិងកូរ៉េខាងត្បូង៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងជើង គំរាមអាមេរិក និងកូរ៉េខាងត្បូង ឲ្យបញ្ឈប់សមយុទ្ធយោធារួមគ្នា ជាបន្ទាន់