ខ្លីៗ ទាក់ទងការបោះឆ្នោតពាក់កណ្តាលអាណត្តិនៅ សហរដ្ឋអាមេរិក

អ្នកមានសិទ្ធិបោះឆ្នោតនៅសហរដ្ឋអាមេរិក នឹងទៅបោះឆ្នោតពាក់កណ្តាលអាណត្តិនៅថ្ងៃពុធទី០៩ខែវិច្ឆិកានេះ (ពេលវេលានៅកម្ពុជា)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានាធិបតី ចូ បៃដិន ខាងគណបក្សប្រជាធិបតេយ្យ និងលោក ដូណាល់ ត្រាំ ខាងគណបក្សសាធារណរដ្ឋ បានខិតខំប្រឹងប្រែងធ្វើយុទ្ធនាការឃោសនានៅនាទីចុងក្រោយ ដើម្បីជួយឲ្យគណបក្សរបស់ពួកគេឈ្នះការគ្រប់គ្រងសភា។

ឆ្នាំនេះ គណបក្សទាំង២នឹងត្រូវប្រកួតប្រជែងដណ្តើមអាសនៈទាំង៤៣៥នៅក្នុងសភាតំណាងរាស្រ្ត និង៣៥អាសនៈ ក្នុងចំណោម១០០អាសនៈរបស់ព្រឹទ្ធសភា។

បច្ចុប្បន្ន គណបក្សប្រជាធិបតេយ្យគ្រប់គ្រងទាំងរដ្ឋសភា និងព្រឹទ្ធសភា។ ការស្ទង់មតិមុនការបោះឆ្នោតបានបង្ហាញថា គណបក្សសាធារណរដ្ឋនឹងឈ្នះសំឡេងភាគច្រើននៅក្នុងសភាតំណាងរាស្រ្ត ខណៈការគ្រប់គ្រងរបស់ព្រឹទ្ធសភាមានការប្រទាញប្រទង់។

ថ្លែងនៅឯការជួបជុំដែលធ្វើឡើងក្នុងរដ្ឋ Maryland កាលពីល្ងាចថ្ងៃចន្ទ លោក បៃដិន បានជំរុញអ្នកបោះឆ្នោតឲ្យទៅបោះឆ្នោតសម្រាប់គណបក្សប្រជាធិបតេយ្យ ដោយនិយាយថា “លទ្ធិប្រជាធិបតេយ្យរបស់យើងកំពុងស្ថិតក្នុងគ្រោះថ្នាក់”។ លោក​ព្រមាន​ថា បេក្ខជន​គណបក្ស​សាធារណរដ្ឋ​ជាច្រើន​នាក់ មិន​បាន​ទទួល​យក​លទ្ធផល​នៃ​ការ​បោះឆ្នោត​ប្រធានាធិបតី​ឆ្នាំ២០២០ទេ។

ទន្ទឹមនឹងនេះ លោក ត្រាំ បានថ្លែងសុន្ទរកថានៅក្នុងរដ្ឋសមរភូមិ Ohio កាលពីល្ងាចថ្ងៃចន្ទដូចគ្នា។ លោកបានស្តីបន្ទោសរដ្ឋបាល លោក បៃដិន ថាបានបង្កឲ្យមានកម្រិតអតិផរណា។ ប្រសិនបើអ្នកចង់បញ្ឈប់ការបំផ្លិចបំផ្លាញប្រទេសនេះ និងជួយសង្គ្រោះក្តីស្រមៃរបស់អាមេរិក នោះ ថ្ងៃស្អែកអ្នកត្រូវតែបោះឆ្នោតឲ្យគណបក្សសាធារណរដ្ឋ។

ការបោះឆ្នោតនេះ ត្រូវបានគេមើលឃើញថាជាការសាកល្បងឥទ្ធិពលរបស់លោក ត្រាំ លើគណបក្សសាធារណរដ្ឋ។ គេ​រំពឹង​ថា ​លោកត្រាំ ​នឹង​ប្រកាសពី​ការឈរឈ្មោះប្រជែងតំណែង​ប្រធានាធិបតី​ឆ្នាំ​២០២៤​ក្នុង​ពេល​ឆាប់ៗ៕

ប្រែសម្រួល៖ Vann Vann

ប្រភព៖ NHK

ចុចអាន៖ បៃដិន ថាឲ្យ ត្រាំ កប់ៗមាត់ មុនការបោះឆ្នោតពាក់កណ្ដាលអាណត្តិ