ម្ចាស់ផ្ទះ G20 ឲ្យពិភពលោកធ្វើការរួមគ្នាដើម្បី “បញ្ចប់សង្គ្រាម”

ប្រធានាធិបតីឥណ្ឌូណេស៊ីលោក Joko Widodo បានបើកកិច្ចប្រជុំកំពូល G20 នៅកោះបាលី ជាមួយនឹងការអំពាវនាវឲ្យពិភពលោក “បញ្ចប់សង្រ្គាម” ចំពេលមានជម្លោះពាក់ព័ន្ធការលុកលុយរបស់រុស្ស៊ីលើអ៊ុយក្រែន ដែលបានជំរុញឲ្យមានភាពតានតឹងផ្នែកភូមិសាស្ត្រនយោបាយ និងបង្កឲ្យមានការកើនឡើងជាសកល នៃវិបត្តិស្បៀងអាហារនិង តម្លៃថាមពល ។

ក្នុងនាមជាម្ចាស់ផ្ទះនៃកិច្ចប្រជុំកំពូលនេះ លោកប្រធានាធិបតីឥណ្ឌូណេស៊ីបាននិយាយថា ពិភពលោកមិនអាចធ្លាក់ចូលទៅក្នុងសង្រ្គាមត្រជាក់ មួយផ្សេងទៀតបាននោះទេ ហើយសមាជិក G20 ត្រូវតែធ្វើការដើម្បី “បញ្ចប់សង្រ្គាម” នៅអ៊ុយក្រែន ។

លោក Widodo បញ្ជាក់ប្រាប់មេដឹកនាំក្នុងកិច្ចប្រជុំ G20 ថា “ប្រសិនបើសង្រ្គាមមិនបញ្ចប់ទេ វានឹងពិបាកសម្រាប់ពិភពលោកក្នុងការរីកចម្រើនទៅមុខ” ។

ក្រុម G20 ដែលបង្កើតឡើងដោយប្រទេសចំនួន ១៩ បូកនឹងសហភាពអឺរ៉ុបផងដែរនោះ តំណាងឲ្យប្រទេសដែលមានសេដ្ឋកិច្ចធំជាងគេទាំង ២០ គឺរួមចំណែកជិត ២ ភាគ ៣ នៃចំនួនប្រជាជនពិភពលោក, ៨៥ ភាគរយនៃទិន្នផលសេដ្ឋកិច្ចពិភពលោក និង ៧៥ ភាគរយនៃពាណិជ្ជកម្មពិភពលោក ។

កិច្ចប្រជុំកំពូលនេះគឺជាលើកដំបូងហើយ ចាប់តាំងពីទីក្រុងមូស្គូបានបញ្ជូនកងទ័ពរបស់ខ្លួនចូលទៅក្នុងប្រទេសអ៊ុយក្រែន កាលពីថ្ងៃទី ២៤ ខែកុម្ភៈ ។ ក្រោយមកលោក Widodo បានទៅបំពេញទស្សនកិច្ចនៅទីក្រុងកៀវ និងទីក្រុងមូស្គូ ហើយថែមទាំងបានអញ្ជើញលោកប្រធានាធិបតីរុស្ស៊ី Vladimir Putin ទោះបីជា G20 មានការអំពាវនាវមិនឲ្យរុស្ស៊ីចូលរួមក៏ដោយ ។

ជាក់ស្ដែងលោក Putin បានបដិសេធសំណើនេះ និងឲ្យលោករដ្ឋមន្ត្រីការបរទេស Sergey Lavrov ធ្វើជាតំណាង ក្នុងការចូលរួមកិច្ចប្រជុំកំពូលមួយនេះ ដែលរៀបចំឡើងនៅកោះបាលី ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ក្រៅពី ឥណ្ឌូណេស៊ី ជាម្ចាស់ផ្ទះ ប្រទេសអាស៊ាន ២ ទៀតក៏ត្រូវបានអញ្ជើញ ចូលរួមកិច្ចប្រជុំ G20 នៅកោះបាលី