ខ្មាន់កាំភ្លើង បាញ់ប្រហារនៅ ប៉ារីស គឺជាអ្នកទើបចេញពីពន្ធនាគារ

កាលពីថ្ងៃសុក្រទី២៣ខែធ្នូ​ ខ្មាន់កាំភ្លើង​ម្នាក់ ​បាន​បើក​ការ​បាញ់ប្រហារ​នៅ​កណ្តាល​ទីក្រុង​ប៉ារីស ដោយសម្លាប់​មនុស្ស​៣​នាក់ និង​ ​៣​នាក់​ផ្សេង​ទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្មាន់កាំភ្លើង​ បាន​កំណត់​គោលដៅ​មជ្ឈមណ្ឌល​វប្បធម៌​ឃើដ ហើយ​បាន​បាញ់​សមាជិក​សហគមន៍​មូលដ្ឋាន។ ការប្រកាន់​ពូជសាសន៍ ​កំពុង​ត្រូវ​បាន​ស៊ើបអង្កេតថាអាចជាហេតុផលជំរុញការវាយប្រហារនេះ។

ជនសង្ស័យអាយុ ៦៩ឆ្នាំ ត្រូវបានចាប់ខ្លួនភ្លាមៗ ហើយមិនយូរប៉ុន្មាន មានព័ត៌មានថា គាត់ទើបត្រូវបានដោះលែងពីពន្ធនាគារ។

ក្រោយ​មក ​ការ​ប៉ះ​ទង្គិច​បាន​ផ្ទុះ​ឡើង​រវាង​ប៉ូលិស និង​ក្រុម​ដែល​​ប្រមូល​ផ្តុំ​គ្នា​នៅ​កន្លែង​កើត​ហេតុ​បន្ទាប់​ពី​ការ​វាយ​ប្រហារ។

ក្រុមប្រឹក្សាប្រជាធិបតេយ្យឃើដនៅប្រទេសបារាំង (CDF-K) ដែលគ្រប់គ្រងមជ្ឈមណ្ឌលរងការវាយប្រហារនៅតំបន់ Strasbourg-Saint Denis ក្នុងសង្កាត់ទី១០ នៃទីក្រុងប៉ារីស បានថ្កោលទោសការវាយប្រហារនេះនៅក្នុងសេចក្តីថ្លែងការណ៍ខ្លីមួយ។ 

មិនមានហេតុផលបញ្ជាក់សម្រាប់ការបាញ់ប្រហារនេះទេ ប៉ុន្តែរដ្ឋអាជ្ញាទីក្រុងប៉ារីស Laure Beccuau បាននិយាយថា ពីមុន ជនសង្ស័យ ត្រូវបានចោទប្រកាន់ពីបទហិង្សារើសអើងជាតិសាសន៍។

ក្នុងឧប្បត្តិហេតុនោះ គឺគាត់បានប្រើដាវវាយប្រហារ នៅជំរំជនចំណាកស្រុកក្នុងទីក្រុងប៉ារីស កាលពីថ្ងៃទី៨ខែធ្នូ ឆ្នាំ២០២១។ ទោះបីជាយ៉ាងណាក៏ដោយ គេមិនច្បាស់ទេថាតើ ហេតុអ្វីបានជាគាត់ត្រូវបានដោះលែងនាពេលថ្មីៗនេះ៕

ប្រែសម្រួល៖ Vann Vann

ប្រភព៖ BBC

ចុចអាន៖ បាញ់ប្រហារ ៣លើក ស្លាប់និងរបួសមនុស្សជាង ៣០នាក់ នៅ សហរដ្ឋអាមេរិក