ចិន ធ្វើសមយុទ្ធយោធាក្បែរកោះតៃវ៉ាន់ ដើម្បីឆ្លើយតបទៅ អាមេរិក (មានវីដេអូ)

បញ្ជាការដ្ឋានតំបន់ភាគខាងកើតបាននិយាយនៅក្នុងសេចក្តីថ្លែងការណ៍មួយថា កងទ័ពរំដោះប្រជាជនចិន (PLA) បានធ្វើសមយុទ្ធយោធានៅជិតកោះតៃវ៉ាន់កាលពីថ្ងៃអាទិត្យទី២៥ខែធ្នូ ខណៈទីក្រុងប៉េកាំង បានស្តីបន្ទោសសហរដ្ឋអាមេរិក និងកោះដែលគ្រប់គ្រងដោយខ្លួនឯងចំពោះការបន្តកើនឡើងភាពតានតឹងនៅក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យបញ្ជាការដ្ឋាន លោកវរសេនីយ៍ឯក Shi Yi បាននិយាយនៅក្នុងសេចក្តីថ្លែងការណ៍ខ្លីមួយថា យោធា បានរៀបចំការល្បាតត្រៀមប្រយុទ្ធរួមគ្នា និងសមយុទ្ធវាយប្រហារដោយកម្លាំងអាវុធរួមគ្នា នៅក្នុងដែនអាកាស និងដែនទឹកជុំវិញកោះតៃវ៉ាន់។

លោកវរសេនីយ៍ឯកបានហៅសមយុទ្ធនេះថា “ជាការឆ្លើយតបយ៉ាងម៉ឺងម៉ាត់ ចំពោះការឃុបឃិតគ្នា និងការបង្កហេតុដោយសហរដ្ឋអាមេរិក និងតៃវ៉ាន់”។ លោកបន្ថែមថា PLA នឹងចាត់វិធានការចាំបាច់ទាំងអស់ ដើម្បីការពារអធិបតេយ្យភាព និងបូរណភាពទឹកដីរបស់ចិន។

ទោះបីជាយ៉ាងណាក៏ដោយ មន្ត្រីចិន មិនបានចង្អុលចំៗចំពោះការញុះញង់របស់សហរដ្ឋអាមេរិកនោះទេ ប៉ុន្តែសមយុទ្ធនេះ បានកើតឡើងត្រឹមតែពីរថ្ងៃប៉ុណ្ណោះ បន្ទាប់ពីប្រធានាធិបតី Joe Biden ចុះហត្ថលេខាលើច្បាប់អនុញ្ញាតការពារជាតិសហរដ្ឋអាមេរិកឆ្នាំ ២០២៣។ កញ្ចប់ថវិកាយោធារបស់អាមេរិកសម្រាប់ឆ្នាំសារពើពន្ធ២០២៣ នឹងផ្តល់ទឹកប្រាក់ ១០ពាន់លានដុល្លារជាជំនួយផ្នែកសន្តិសុខ និងការទិញសព្វាវុធសម្រាប់កោះតៃវ៉ាន់។

ក្រសួងការពារជាតិចិនកាលពីថ្ងៃសៅរ៍ បានរិះគន់ច្បាប់នេះ ថាជាទង្វើមួយផ្សេងទៀតដែល ធ្វើឲ្យប៉ះពាល់យ៉ាងធ្ងន់ធ្ងរដល់សន្តិភាព និងស្ថិរភាព នៅច្រកសមុទ្រតៃវ៉ាន់ ហើយបង្កើនហានិភ័យនៃជម្លោះយោធាដោយផ្ទាល់រវាងទីក្រុងវ៉ាស៊ីនតោន និងប៉េកាំង។

​រហូត​មក​ដល់​ពេល​នេះ រដ្ឋាភិបាល​តៃវ៉ាន់​មិន​ទាន់​ធ្វើ​អត្ថាធិប្បាយ​អំពី​ការ​អភិវឌ្ឍ​នេះ​ទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ចំណុចសំខាន់ៗ ដែលអ្នកគួរដឹងអំពីសមយុទ្ធ Vostok 2022