ចិន ព្រមានតៃវ៉ាន់ កុំយកប្រជាជន ធ្វើជា “ទាហានសម្រាប់ស្លាប់នៅក្នុងសង្គ្រាម” (មានវីដេអូ)

ក្រសួងការបរទេសចិនកាលពីថ្ងៃពុធទី២៨ខែធ្នូ បានរិះគន់ការសម្រេចចិត្តរបស់ទីក្រុងតៃប៉ិ ក្នុងការពង្រីករយៈពេលបំពេញកាតព្វកិច្ចយោធាពីបួនខែទៅមួយឆ្នាំ។ អ្នកនាំពាក្យក្រសួងនិយាយថា កោះនេះកំពុងប្រើប្រាស់ប្រជាជនរបស់ខ្លួនធ្វើជា “ទាហានសម្រាប់ស្លាប់នៅក្នុងសង្គ្រាម” ដើម្បីជំរុញមហិច្ឆតាផ្តាច់ខ្លួន របស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសួរអំពីការសម្រេចចិត្តរបស់ទីក្រុងតៃប៉ិ អ្នកនាំពាក្យក្រសួង លោក Wang Wenbin បានប្រាប់អ្នកសារព័ត៌មានថា “ការតស៊ូដើម្បីកិច្ចការដ៏អស្ចារ្យនៃការសម្រេចបាននូវការបង្រួបបង្រួមជាតិឡើងវិញគឺមានសារសំខាន់ដែលមិនអាចកាត់ថ្លៃបាន ការស្លាប់សម្រាប់សកម្មភាពផ្តាច់ខ្លួនឯករាជ្យរបស់តៃវ៉ាន់គឺគ្មានតម្លៃអ្វីទេ”។

មន្ត្រីដដែលនិយាយថា ទីក្រុងប៉េកាំងជឿថា ជនរួមជាតិតៃវ៉ាន់មានគោលការណ៍ខ្ពស់ ពួកគេនឹងមិនត្រូវបានយកទៅបម្រើជាទាហានសម្រាប់ស្លាប់ក្នុងសង្គ្រាម ដោយកងកម្លាំងផ្តាច់ខ្លួនឯករាជ្យតៃវ៉ាន់ឡើយ។

សម្តីរបស់គាត់បានកើតឡើងមួយថ្ងៃ បន្ទាប់ពីប្រធានាធិបតីកោះគ្រប់គ្រងដោយខ្លួនឯងគឺលោកស្រី Tsai Ing-wen បានប្រកាសពីការពង្រីករយៈពេលបំពេញកាតព្វកិច្ចយោធា ដោយលើកឡើងពី ការបំភិតបំភ័យ និងការគំរាមកំហែងរបស់ចិនប្រឆាំងនឹងតៃវ៉ាន់។

ថ្វីបើលោកស្រីទទួលស្គាល់ថា នេះគឺជាការសម្រេចចិត្តដ៏ពិបាកក៏ដោយ ប៉ុន្តែលោកស្រី Tsai អះអាង កោះនេះចាំបាច់ត្រូវការកងទ័ពប្រសើរជាងមុន ដោយសារប្រព័ន្ធយោធាបច្ចុប្បន្នមិនគ្រប់គ្រាន់ទេ ជាពិសេសក្នុងករណីមានការវាយប្រហារយ៉ាងឆាប់រហ័សលើកោះតៃវ៉ាន់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ តៃវ៉ាន់ ពង្រីករយៈពេលការចូលបំពេញកាតព្វកិច្ចយោធា ក្រោយរងសម្ពាធពី ចិន