តៃវ៉ាន់ ពង្រីករយៈពេលការចូលបំពេញកាតព្វកិច្ចយោធា ក្រោយរងសម្ពាធពី ចិន

កោះតៃវ៉ាន់នឹងបន្ថែមរយៈពេលនៃការចូលបំពេញកាតព្វកិច្ចយោធារបស់ខ្លួនពី ៤ ខែឡើងរហូតដល់ ១ ឆ្នាំ ដោយសារតែការកើនឡើងសម្ពាធយោធាពីសំណាក់ប្រទេសចិន ។

ប្រធានាធិបតីតៃវ៉ាន់លោកស្រី Tsai Ing-wen បានប្រកាសពីការសម្រេចចិត្តនេះ នៅក្នុងសន្និសីទសារព័ត៌មានមួយ បន្ទាប់ពីបានកោះប្រជុំទីភ្នាក់ងារសន្តិសុខជាតិកាលពីថ្ងៃអង្គារ ។

បុរសនៅតៃវ៉ាន់ទាំងអស់ដែលមានអាយុលើសពី ១៨ ឆ្នាំ គឺតម្រូវឲ្យចូលបម្រើក្នុងជួរកងទ័ព ខណៈការបន្ថែមរយៈពេលសម្រាប់កាតព្វកិច្ចនេះនឹងចាប់ផ្តើមនៅឆ្នាំ ២០២៤ ហើយអនុវត្តចំពោះបុរសដែលកើតក្រោយថ្ងៃទី ១ ខែមករា ឆ្នាំ ២០០៥ ។

នៅក្នុងសន្និសីទសារព័ត៌មាន លោកស្រី Tsai បាននិយាយថា រយៈពេលបច្ចុប្បន្ននៃការចូលធ្វើទាហានចំនួន ៤ ខែ គឺមិនបានឆ្លើយតបនឹងតម្រូវការយោធារបស់តៃវ៉ាន់នោះទេ ហើយបើតៃវ៉ាន់ចង់​ទទួល​បាន​ការ​គាំទ្រ​ពី​អន្តរជាតិ​ ​ លុះត្រា​តែកោះនេះ​បង្កើន​ការ​ការពារ​របស់​ខ្លួន ។

ជាចុងក្រោយលោកស្រី Tsai បានអំពាវនាវដល់យុវជនឲ្យមានការយោគយល់ចំពោះច្បាប់ថ្មីនេះ ប៉ុន្តែទោះជាយ៉ាងណា លោកស្រីបញ្ជាក់ច្បាស់ថា ពួកគេនឹងមិនចាំបាច់ទៅសមរភូមិនោះទេ ប្រសិនបើតៃវ៉ាន់មានកម្លាំងគ្រប់គ្រាន់នោះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ តៃវ៉ាន់ ថា ចិន បើកការ​លុកលុយ​យោធា​ទ្រង់ទ្រាយ​ធំ​បំផុត