អ្នកនាំពាក្យក្រសួងការពារជាតិអាមេរិកលោកឧត្តមសេនីយឯក Pat Rider និយាយថា យោធាអាមេរិកបានចាប់ផ្តើមបង្ហាត់បង្រៀនកងទ័ពអ៊ុយក្រែនឲ្យចេះប្រើប្រាស់ និងថែរក្សាប្រព័ន្ធខែលការពារមីស៊ីល Patriot ។

លោក Rider បានប្រាប់អ្នកយកព័ត៌មានកាលពីថ្ងៃអង្គារថា “កងទ័ពអ៊ុយក្រែនលើសពី ៩០ ទៅ ១០០ នាក់នឹងត្រូវហ្វឹកហាត់របៀបរបបប្រើប្រាស់ប្រព័ន្ធខែលការពារមីស៊ីលមួយនេះ រយៈពេលជាច្រើនខែនៅឯមូលដ្ឋានកងទ័ពក្នុងរដ្ឋ Oklahoma” ។

ការចាប់ផ្ដើមហ្វឹកហាត់ដល់កងកម្លាំងអ៊ុយក្រែនបានកើតឡើង បន្ទាប់ពីសហរដ្ឋអាមេរិកបានសម្រេចចិត្តផ្តល់ប្រព័ន្ធខែលការពារមីស៊ីល Patriot ដល់រដ្ឋាភិបាលទីក្រុងកៀវ ដើម្បីពង្រឹងសមត្ថភាពការការពារដែនអាកាសរបស់ប្រទេសប្រឆាំងនឹងមីស៊ីលរបស់រុស្ស៊ី ។

ស្របពេលជាមួយគ្នានេះ ប្រព័ន្ធផ្សព្វផ្សាយសហរដ្ឋអាមេរិកបានរាយការណ៍ថា ទាហានអ៊ុយក្រែនជាង ៣,១០០ នាក់ហើយបានទទួលការបណ្ដុះបណ្ដាលផ្ទាល់ដៃដោយគ្រូយោធាអាមេរិក ដើម្បីឲ្យចេះប្រើប្រាស់អាវុធ និងឧបករណ៍មួយចំនួនផ្សេងទៀត ជាពិសេសប្រព័ន្ធបាញ់រ៉ុកកែត HIMARS ក៏ដូចជាប្រព័ន្ធខែលការពារមីស៊ីល Patriot នេះដើម្បីទប់ទល់ជាមួយនឹងរុស្ស៊ី ។

គួរបញ្ជាក់ថា ប្រព័ន្ធខែលការពារ Patriot ដែលផលិតដោយសហរដ្ឋអាមេរិក គឺជាប្រព័ន្ធមីស៊ីលចល័តបាញ់ពីដីទៅអាកាស មានសមត្ថភាពស្ទាក់ចាប់មីស៊ីលផ្លោង និងមីស៊ីលនាំផ្លូវ ព្រមទាំងយន្តហោះចម្បាំងផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹងចំនួនទ័ព អ៊ុយក្រែន ដែលគ្រូយោធា អាមេរិក បង្ហាត់ផ្ទាល់ដៃដើម្បីទប់ រុស្ស៊ី