រថយន្តក្រុង​ធ្លាក់ជ្រោះ​នៅខេត្តសុផាន់បុរី​ស្លាប់ភ្ញៀវទេសចរ​ថៃ ១៨ នាក់

អ្នកទេសចរថៃចំនួន ១៨ នាក់បានស្លាប់បាត់បង់ជីវិតនៅក្នុងហេតុការណ៍គ្រោះថ្នាក់រថយន្តធ្លាក់ចូលក្នុងជ្រោះ ជម្រៅប្រមាណ ២០ ម៉ែត្រ កាលពីព្រឹកថ្ងៃទី ៦ ខែកុម្ភៈ ឆ្នាំ ២០២៣ នៅកំណាត់ផ្លូវចង្កេះភ្នំក្នុងស្រុកដានឆាង ខេត្តសុផាន់បុរី ប្រទេសថៃ។

ភ្លាមៗនោះដែរ ទាំងកម្លាំងយោធា ក៏ដូចជាក្រុមប្រជាពលរដ្ឋ និងតម្រួតប្រចាំតំបន់បានប្រើប្រាស់ខ្សែដើម្បីចុះទៅក្រោមប្រមូលសព និងបានប្រើប្រាស់រថយន្តស្ទូចធុន ២៥ តោន ដើម្បីលើករថយន្តក្រុងនោះឡើងមកខាងលើ ដោយឡែកអ្នកបើកបរបានបើកទ្វារលោតនៅក្នុងជម្រៅប្រហែល១០ម៉ែត្រ បណ្តាលឱ្យរងរបួសធ្ងន់។

ក្រោយពេលត្រួតពិនិត្យ នៅក្នុងរថយន្តនោះមានភ្ញៀវទេសចរសរុបចំនួន ១៨ នាក់ បានស្លាប់ទាំងអស់ ដែលបញ្ហានេះ បានបង្កឱ្យមានភាពសោកសង្រែងយ៉ាងខ្លាំងដល់ក្រុមគ្រួសារ និងសាច់ញាតិដែលបានមកទទួលយកសពទៅធ្វើបុណ្យ។សមត្ថកិច្ចបានអះអាងថា នឹងធ្វើការសាកសួរអោយដឹងពីមូលហេតុ នៅពេលដែលអ្នកបើកបរដឹងខ្លួន ព្រោះបើតាមការសិក្សាអំពីប្រវត្តិ គឺអ្នកបើកបរបានបើករថយន្តជាង២០ឆ្នាំហើយ មិនដែលមានបញ្ហាអ្វីសោះឡើយ។

តែបើតាមការនិយាយតៗគ្នាទៅលើជំនឿអរូបីយ៍ គឺគេបានផ្តោតទៅលើរូបថតមួយសន្លឹកដែលភ្ញៀវទេសចរទាំងអស់ បានថតទុកជាអនុស្សាវរីយ៍នៅមុខរូបសំណាកព្រះបដិមាករ មុនចេញដំណើរ ដែលថតជាប់តែជើងព្រះបដិមា មិនបានជាប់រូបអោយពេញលេញ៕

អត្ថបទ៖ សោ និយមរ័ត្ន