ព័ត៌មានអន្ដរជាតិ

ចិន ប្រាប់ អាមេរិក ថា មិនព្រឺខ្លាចប្រកួតប្រជែងជាមួយឡើយ

បានផុស

២ years មុន

នៅ

ថ្ងៃព្រហស្បតិ៍ ៩ កុម្ភៈ ២០២៣

ដោយ

យោងតាមប្រព័ន្ធផ្សព្វផ្សាយចិនឲ្យដឹងថា រដ្ឋាភិបាលទីក្រុងប៉េកាំងមិនព្រឺខ្លាចបន្តិចឡើយចំពោះការប្រកួតប្រជែងជាមួយអាមេរិក បន្ទាប់ពីលោកប្រធានាធិបតី Joe Biden លើកឡើងពីបញ្ហាមួយនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសចិនលោកស្រី Mao Ning បាននិយាយនៅក្នុងសន្និសីទសារព័ត៌មានមួយថា ទីក្រុងប៉េកាំងជំទាស់នឹងការប្រកួតប្រជែងដើម្បីកំណត់ទំនាក់ទំនង ចិន-អាមេរិក ដែលរួមមានសិទ្ធិអភិវឌ្ឍន៍ស្របច្បាប់របស់ចិន និងធ្វើឲ្យប៉ះពាល់ដល់ខ្សែសង្វាក់ឧស្សាហកម្ម និងការផ្គត់ផ្គង់សកល ។

អ្នកនាំពាក្យរូបនេះប្រាប់ទៀតថា ចិននឹងដោះស្រាយទំនាក់ទំនង ចិន-អាមេរិក ដោយផ្អែកលើការគោរពគ្នាទៅវិញទៅមក ការរួមរស់ដោយសន្តិភាព និងកិច្ចសហប្រតិបត្តិការឈ្នះ-ឈ្នះ ក៏ដូចជាការការពារអធិបតេយ្យភាព សុវត្ថិភាព និងផលប្រយោជន៍របស់ខ្លួន ។

នេះជាការឆ្លើយតបរបស់ លោកស្រី Mao សំដៅលើសុន្ទរកថាកាលពីថ្ងៃអង្គាររបស់លោក Biden ដែលលោកនិយាយថា អាមេរិក គឺស្វែងរកការប្រកួតប្រជែង មិនមែនជម្លោះជាមួយប្រទេសចិនឡើយ ។

ក្នុងអំឡុងពេលថ្លែងសុន្ទរកថាទៅកាន់សភាតំណាងរាស្រ្ត លោក Biden លើកឡើងថា អាមេរិកនឹងមិនខ្មាស់អៀនពីការប្រកួតប្រជែងនោះទេ ហើយបញ្ហានេះគួរតែបង្រួបបង្រួមជាតិ ។ ប៉ុន្តែទាក់ទងនឹង ការបាញ់ទម្លាក់បាឡុងចិន លោក Biden បញ្ជាក់ថា ប្រសិនបើចិនគំរាមកំហែងអធិបតេយ្យភាពរបស់អាមេរិក នោះអាមេរិក នឹងធ្វើសកម្មភាពដើម្បីការពារប្រទេស ហើយក៏បានធ្វើរួចហើយដែរ ។

ទោះយ៉ាងណា លោកស្រី Mao Ning បានហៅការបាញ់ទម្លាក់បាឡុងដោយអាមេរិកថា ជារឿងមិនអាចទទួលយកបាន និងមិនទទួលខុសត្រូវ ហើយចាប់តាំងពីពេលនោះមក ចិនបានចោទប្រកាន់ទីក្រុងវ៉ាស៊ីនតោនថា ធ្វើឲ្យខូចខាតវឌ្ឍនភាពនៃទំនាក់ទំនងទ្វេភាគី ៕

ប្រែសម្រួលដោយ ៖ នាង រតនៈ

ប្រភព ៖ Anadolu

ចុចអាន ៖ លោក Zelensky សុំ អាល្លឺម៉ង់ ជួយ អ៊ុយក្រែន បន្ថែម ខណៈ បារាំង មិនអនុញ្ញាតឲ្យ រុស្ស៊ី ឈ្នះសង្គ្រាមឡើយ