ត្រឹមមួយថ្ងៃ ព្យុះសាហាវជាង២៥០ វាយប្រហារអាមេរិក បង្កការបំផ្លិចបំផ្លាញធំធេង

ព្យុះដ៏បំផ្លិចបំផ្លាញបានបង្កការខូចខាតយ៉ាងធំធេងនៅរដ្ឋមួយចំនួន របស់សហរដ្ឋអាមេរិកកាលពីថ្ងៃសុក្រទី៣១ខែមីនា ខណៈមានសេចក្តីរាយការណ៍អំពីមនុស្សស្លាប់ជាច្រើននាក់នៅភាគខាងត្បូង និងភាគកណ្តាល។

ឧបទ្ទវហេតុបណ្តាលឲ្យមានមនុស្សស្លាប់និងរបួសច្រើននាក់ ត្រូវបានប្រកាស បន្ទាប់ពីខ្យល់កន្រ្តាក់ធ្វើឲ្យបាក់ដំបូល នៅឯកន្លែងប្រគំតន្ត្រីមួយក្នុងទីក្រុង Belvidere នៃរដ្ឋ Illinois។

ហេតុការណ៍បានកើតឡើងក្នុងអំឡុងពេលនៃការប្រគំតន្ត្រីនៅឯរោងមហោស្រព Apollo ក្នុងទីក្រុង Belvidere ចំពេលមានខ្យល់បក់ខ្លាំងដោយសារព្យុះ។ មន្ត្រី​ក្រុង​និយាយ​ថា មនុស្ស​ម្នាក់​បាន​ស្លាប់​នៅ​នឹង​កន្លែង​ ខណៈ២៨នាក់​ផ្សេង​ទៀត​រង​របួស។

ខ្យល់ព្យុះដ៏ខ្លាំងក៏បានបោកបក់នៅភាគខាងលិច និងខាងត្បូងសហរដ្ឋអាមេរិកផងដែរ កាលពីល្ងាចថ្ងៃសុក្រ ដោយអភិបាលរដ្ឋ Arkansas លោកស្រី Sarah Huckabee Sanders បានប្រកាសភាពអាសន្ន បន្ទាប់ពីព្យុះកំបុតត្បូង វាយប្រហារទីក្រុងជាច្រើន។ មនុស្ស៣នាក់ត្រូវបានរាយការណ៍ថា ស្លាប់នៅក្នុងរដ្ឋ Arkansas ខណៈជាង៤០នាក់រងរបួស។

អាកាសធាតុ​អាក្រក់ ​ក៏​បាន​បង្ក​ការ​ខូច​ខាត​នៅ​រដ្ឋ​ផ្សេង​ទៀតផងដែរ។ មនុស្សរាប់រយនាក់នៅក្នុងទីក្រុង Charlotte នៃរដ្ឋ Iowa ត្រូវបានជម្លៀស បន្ទាប់ពីការលេចធ្លាយឧស្ម័នដែលបង្កឡើងដោយព្យុះ ខណៈនៅទីក្រុង Covington នៃរដ្ឋ Tennessee, ប៉ូលិសក្នុងតំបន់បានប្រកាសថា ផ្លូវមិនអាចឆ្លងកាត់បានទេ ដោយសារតែកម្ទេចកម្ទីរាំងស្ទះចរាចរណ៍។

យោងតាមសេវាអាកាសធាតុជាតិ, ព្យុះដ៏សាហាវជាង២៥០ បានវាយប្រហារទូទាំងសហរដ្ឋអាមេរិកត្រឹមតែមួយថ្ងៃសុក្រ។ សេវានេះក៏បានចេញការព្រមានអំពីព្យុះកំបុតត្បូងចំនួន១២០ផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ព្យុះ Ida សម្លាប់មនុស្ស ៦០នាក់នៅអាមេរិក