រដ្ឋមន្ត្រី​អ៊ូហ្គង់ដា លួចស័ង្កសីរាប់ម៉ឺនសន្លឹក ដែលគេទុកជួយជនងាយរងគ្រោះ

រដ្ឋមន្ត្រី​អ៊ូហ្គង់ដា​មួយ​រូប ត្រូវជាប់​ពន្ធនាគារ បន្ទាប់​ពីរងការ​ចោទ​ប្រកាន់​ជុំវិញ​រឿង​អាស្រូវ​ពាក់ព័ន្ធ​នឹង​ការ​លួចស័ង្កសីរាប់ម៉ឺនសន្លឹក ដែលគេបម្រុងទុកសម្រាប់សហគមន៍ងាយរងគ្រោះនៅក្នុងតំបន់ Karamoja ភាគឦសានប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ លោកស្រី Mary Goretti Kitutu Kimono រដ្ឋមន្ត្រី​ប្រចាំ​តំបន់នេះ ​មិន​សារភាពទទួល​កំហុស​ទេនៅ​ក្នុង​តុលាការ។

លើសពីនេះ ឥស្សរជនជាន់ខ្ពស់របស់រដ្ឋាភិបាលចំនួន១០នាក់ផ្សេងទៀត ក៏ត្រូវបានគេចោទប្រកាន់ថា បានទទួលស័ង្កសីដែលលួចបានផងដែរ។ មន្ត្រីទាំងនេះរួមមាន អនុប្រធានាធិបតី នាយករដ្ឋមន្ត្រី ប្រធានសភា និងរដ្ឋមន្ត្រីផ្សេងទៀត។

មន្ត្រីមួយចំនួន បានប្រាប់គណៈកម្មាធិការសភាដែលស៊ើបអង្កេតរឿងអាស្រូវពុករលួយពាក់ព័ន្ធនឹងស័ង្កសីដែលបាត់ចំនួន១៤៥០០សន្លឹកថា ពួកគេមិនបានដឹងរឿងនេះទេ។

ទន្ទឹមនេះ នាយក​រដ្ឋមន្ត្រី​បាន​សុំ​ទោស និង​ជំរុញ​ឲ្យ​មន្ត្រី​ផ្សេង​ទៀត ប្រគល់ស័ង្កសីទាំងនោះមកវិញ។

យោងតាមប្រព័ន្ធផ្សព្វផ្សាយក្នុងស្រុកបានឲ្យដឹងថា កាលពីពេលថ្មីៗនេះ រដ្ឋមន្ត្រីម្នាក់ ក៏ត្រូវបានគេបង្ខំឲ្យរុះស័ង្កសីចេញពីដំបូលរោងពពែរបស់គាត់ផងដែរ។

គួរបញ្ជាក់ថា អស់រយៈពេលជាច្រើនទសវត្សរ៍មកហើយ តំបន់ Karamoja បានប្រឈមមុខនឹងគ្រោះរាំងស្ងួត និងទឹកជំនន់ជាបន្តបន្ទាប់៕

ប្រែសម្រួល៖ Vann Vann

ប្រភព៖ BBC

ចុចអាន៖ អ៊ូហ្គង់ដា ប្រាប់ឲ្យប្រជាជនប្រយ័ត្ន ខណៈរកឃើញអ្នកឆ្លងជំងឺអេបូឡា ៩ករណីទៀត