ព័ត៌មានអន្ដរជាតិ

រុស្ស៊ី បើកការវាយប្រហារដោយយន្តហោះគ្មានមនុស្សបើក ទ្រង់ទ្រាយធំបំផុត លើអ៊ុយក្រែន

បានផុស

៣ years មុន

នៅ

ថ្ងៃអង្គារ ៩ ឧសភា ២០២៣

ដោយ

ស៊ីរ៉ែនប្រកាសអាសន្នការវាយឆ្មក់តាមអាកាស បានបន្លឺឡើងពាសពេញប្រទេសអ៊ុយក្រែន បន្ទាប់ពីរុស្ស៊ី បើកការវាយប្រហារដោយយន្តហោះគ្មានមនុស្សបើក និងមីស៊ីល។

យន្តហោះគ្មានមនុស្សបើក kamikaze (រូបថត៖ Washington Institute)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្ទុះ ត្រូវបានគេឮពេញមួយយប់នៅរដ្ឋធានីកៀវ ជាកន្លែងដែលអភិបាលក្រុងនិយាយថា មនុស្សចំនួន៥នាក់បានរងរបួស ក្នុងការវាយប្រហារដោយយន្តហោះគ្មានមនុស្សបើក kamikaze ទ្រង់ទ្រាយធំបំផុត មិនធ្លាប់មានសោះបើគិតមកត្រឹមពេលនេះ។

ស្របពេលជាមួយគ្នានោះ មនុស្សម្នាក់ត្រូវបានសម្លាប់ក្នុងការវាយប្រហារនៅតំបន់ Odesa ភាគខាងត្បូង ខណៈកាកបាទក្រហមអ៊ុយក្រែននិយាយថា ឃ្លាំងស្តុកទំនិញរបស់ខ្លួន ក៏ត្រូវវាយប្រហារផងដែរ។

នេះគឺជាការវាយប្រហារលើកទីបួនក្នុងរយៈពេលប្រាំបីថ្ងៃនៅទីក្រុងកៀវ ហើយកើតឡើងត្រឹមតែ២៤ម៉ោងប៉ុណ្ណោះ មុនពេលរុស្ស៊ីប្រារព្ធទិវាជ័យជម្នះ។

យោធាអ៊ុយក្រែននិយាយថា ក្នុងការវាយឆ្មក់ចុងក្រោយបំផុតរបស់រុស្ស៊ី ដែលមានរយៈពេលជាង៤ម៉ោង និងធ្វើឡើងផ្តើមភ្លាមៗបន្ទាប់ពីពាក់កណ្តាលអធ្រាត្រ, គេបានឃើញយន្តហោះគ្មានមនុស្សបើក Shahed kamikaze ផលិតដោយអ៊ីរ៉ង់ ហោះពាសពេញប្រទេស។

យោងតាមអភិបាលក្រុងកៀវ លោក Vitaliy Klitschko, រុស្ស៊ី បានបង្ហោះយន្តហោះគ្មានមនុស្សបើកជិត៦០គ្រឿង។ លោកបានបន្ថែមថា យន្តហោះគ្មានមនុស្សបើកចំនួន៣៦គ្រឿង ត្រូវបានបំផ្លាញលើទីក្រុង កៀវ ប៉ុន្តែមនុស្ស៥នាក់ត្រូវរងរបួសដោយសារការធ្លាក់កម្ទេចកម្ទីពីយន្តហោះគ្មានមនុស្សបើក៕

ប្រែសម្រួល៖ Vann Vann

ប្រភព៖ BBC

ចុចអាន៖ ទិវាជ័យជម្នះរុស្ស៊ីឆ្នាំនេះ ប្រារព្ធធ្វើឡើងទាំងមានភាពភ័យខ្លាច ផ្នែកសន្តិសុខ