ឡាវ ឲ្យពលរដ្ឋរស់នៅក្រុងវៀងចន្ទន៍ បន្ថយការប្រើប្រាស់ទឹក

រដ្ឋាភិបាលឡាវបានណែនាំទៅដល់ពលរដ្ឋរស់នៅក្នុងទីក្រុងវៀងចន្ទន៍ ឲ្យកំណត់ការប្រើប្រាស់ទឹករបស់ពួកគេ ស្របពេលដែលទីក្រុងកំពុងជួបប្រទះនឹងការខ្វះខាតទឹកយ៉ាងធ្ងន់ធ្ងរ ។

សេចក្ដីអំពាវនាវរបស់រដ្ឋាភិបាលឡាវបានកើតឡើង ដោយសារតែក្នុងរដូវប្រាំង ប្រជាពលរដ្ឋរស់នៅក្នុងទីក្រុងវៀងច័ន្ទន៍ បានរាយការណ៍ពីការខ្វះខាតទឹកធ្ងន់ធ្ងរ ជាមួយនឹងគុណភាពផ្គត់ផ្គង់ទឹកមិនល្អ ។

ទន្ទឹមនោះសហគ្រាសរដ្ឋផ្គត់ផ្គង់ទឹកក្រុងវៀងចន្ទន៍ក៏បានឆ្លើយតបទៅនឹងការត្អូញត្អែរពីប្រជាពលរដ្ឋផងដែរ ដោយស្នើឲ្យពួកគេកាត់បន្ថយការប្រើប្រាស់ទឹក និងស្តុកទឹកទុកក្នុងករណីមានអាសន្ន ដូចជាការដាច់ចរន្តអគ្គិសនីជាដើម ។

ស្របពេលជាមួយគ្នានេះ សហគ្រាសក៏បានចេញសេចក្តីជូនដំណឹងតាមប្រព័ន្ធអ៊ីនធឺណិតដែរថា ដោយសារការកើនឡើងនៃតម្រូវការទឹក រួមជាមួយនឹងអាកាសធាតុក្តៅ និងព្យុះផងនោះ ទើបនាំឲ្យមានការខ្វះខាតទឹកនៅតំបន់មួយចំនួនក្នុងរាជធានី ដូច្នេះសូមប្រជាពលរដ្ឋកំណត់ការប្រើប្រាស់ទឹកក្នុងកម្រិតណាមួយ ។

បន្ថែមពីនេះ សម្ភារៈមួយចំនួន រួមទាំងម៉ាស៊ីនបូមទឹកផងនោះ ក៏មិនអាចដំណើរការបូមទឹកបានដែរ ដោយសារតែការដាច់ចរន្តអគ្គិសនីនៅតំបន់មួយចំនួន ទើបបណ្តាលឲ្យមានការពន្យារពេលការផ្គត់ផ្គង់ទឹក ៕

ប្រែសម្រួលដោយ ៖ ជីវ័ន្ត

ប្រភព ៖ Laotian Time

ចុចអាន ៖ បក្សភឿថៃ គំរាមដកខ្លួនចេញពីក្រុមចម្រុះ បើមិនបានតំណែងកំពូលមួយនេះ