អាស៊ាន និងជប៉ុន ចុះកិច្ចព្រមព្រៀងសហប្រតិបត្តិការសេដ្ឋកិច្ច

ប្រទេសជប៉ុន និងសមាគមប្រជាជាតិអាស៊ីអាគ្នេយ៍ (អាស៊ាន) បានចុះហត្ថលេខាលើកិច្ចព្រមព្រៀងស្ដីពីកញ្ចប់នៃវិធានការសហប្រតិបត្តិការសេដ្ឋកិច្ច ចំពេលខួបទំនាក់ទំនង ៥០ ឆ្នាំ ។

ក្នុងអំឡុងពេលវេទិកានាទីក្រុងតូក្យូនៅថ្ងៃចន្ទនេះ អង្គការពាណិជ្ជកម្មខាងក្រៅរបស់ប្រទេសជប៉ុន និងស្ថាប័នផ្សេងទៀតបានចុះហត្ថលេខាលើអនុស្សរណៈនៃការយោគយល់គ្នា (MOU) ដើម្បីគាំទ្រដល់ការចាប់ផ្តើមគម្រោងអាជីវកម្មថ្មីនេះ ។

នៅក្នុងអនុស្សរណៈនោះផងដែរ ក៏បានអំពាវនាវឲ្យអង្គការធានារ៉ាប់រងពាណិជ្ជកម្មដែលពាក់ព័ន្ធជាមួយរដ្ឋាភិបាលជប៉ុន និងធនាគារ MUFG ផ្តល់ការវិនិយោគ និងប្រាក់កម្ចីដល់សមាជិកអាស៊ាន សម្រាប់កិច្ចខិតខំប្រឹងប្រែងគ្មានកាបូន ។

ថ្លែងក្នុងវេទិកានោះ រដ្ឋមន្ត្រីក្រសួងសេដ្ឋកិច្ចពាណិជ្ជកម្មជប៉ុន លោក Nishimura Yasutoshi បាននិយាយថា “អាស៊ានកំពុងបង្ហាញពីកំណើនគួរឲ្យកត់សម្គាល់ ខណៈដែលប្រទេសជប៉ុនមានបច្ចេកវិទ្យាទំនើប ។ ការប្រើប្រាស់ចំណុចខ្លាំងរបស់ភាគីទាំងពីរដើម្បីបង្កើតអនាគតរួមគ្នាដោយផ្អែកលើការជឿទុកចិត្ត គឺជាទិសដៅដែលយើងគួរមាន” ។

គួរបញ្ជាក់ថា ប្លុកអាស៊ានទាំង ១០ មានចំនួនប្រជាជន និងពាណិជ្ជកម្មពិភពលោកច្រើនជាង ៨ ភាគរយ ខណៈរដ្ឋាភិបាល​ជប៉ុនក៏​គ្រោង​នឹង​អញ្ជើញ​ថ្នាក់​ដឹក​នាំ​នៃ​ប្លុកក្នុង​តំបន់ទាំងអស់ ​ទៅ​កាន់​កិច្ច​ប្រជុំ​កំពូល​ពិសេស​មួយ​នៅ​ខែ​ធ្នូ ដើម្បី​ពង្រឹង​ទំនាក់​ទំនង​បន្ថែម​ទៀតផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អតីតមេប៉ូលិស ថៃ ជំរុញឲ្យសមាជិកព្រឹទ្ធសភាបោះឆ្នោតជូនលោក Pita ធ្វើជានាយករដ្ឋមន្ត្រី