ថៃ អនុញ្ញាតឲ្យអ្នកធ្វើការរដ្ឋ ឈប់សម្រាក១៥ថ្ងៃ ក្រោយភរិយាសម្រាលកូន

រដ្ឋាភិបាលថៃ បានបន្ថែមរយៈពេលឈប់សម្រាកមាតុភាព សម្រាប់អ្នកធ្វើការរដ្ឋជាបុរស ដោយអនុញ្ញាតឲ្យពួកគេឈប់សម្រាក ព្រមទាំងទទួលបានប្រាក់ឈ្នួលចំនួន១៥ថ្ងៃផងដែរ បន្ទាប់ពីភរិយាពួកគេសម្រាលកូន។

លោកឧបនាយករដ្ឋមន្ត្រី Wissanu Krea-ngam បាននិយាយថា ការបន្ថែមពេលឈប់សម្រាកនេះ គឺជាផ្នែកមួយនៃសេចក្តីប្រកាសរបស់គណៈកម្មាធិការប្រតិបត្តិបុគ្គលិករដ្ឋថ្មី ទាក់ទងនឹងអត្ថប្រយោជន៍ដល់អ្នកធ្វើការឲ្យរដ្ឋ ដែលត្រូវបានចុះហត្ថលេខាកាលពីថ្ងៃចន្ទទី៥ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទប្បញ្ញត្តិឈប់សម្រាកមាតុភាពនេះ ត្រូវបានបញ្ចូលទៅក្នុងច្បាប់ឈប់សម្រាកលំហែមាតុភាពនៅក្នុងកំណែចាស់ ដែលបានដាក់ចេញក្នុងឆ្នាំ២០១១។ កំណែមុន គឺបានកំណត់សិទ្ធិសម្រាប់តែមន្ត្រីរាជការប៉ុណ្ណោះ ដែលការឈប់សម្រាកមាតុភាពនោះគឺមានរយៈពេល៩៨ថ្ងៃសម្រាប់មន្រ្តីរាជការជាស្រ្តី និង១៥ថ្ងៃសម្រាប់មន្ត្រីរាជការជាបុរស។

ទោះបីជាយ៉ាងណាក៏ដោយ អ្នកធ្វើការឲ្យរដ្ឋជាស្រ្តី បានទទួលបានអនុញ្ញាតឲ្យឈប់សម្រាកមាតុភាព រយៈពេល៩០ថ្ងៃ រួចទៅហើយ។

លោក Wissanu និយាយថា បទប្បញ្ញត្តិដែលធ្វើបច្ចុប្បន្នភាពនេះ នឹងផ្តល់សិទ្ធិស្មើៗគ្នាដល់អ្នកធ្វើការដែលជួលដោយភ្នាក់ងាររដ្ឋាភិបាល ប៉ុន្តែមិនទទួលបានអត្ថប្រយោជន៍ដូចជាមន្ត្រីរាជការនោះទេ។

គួរបញ្ជាក់ថា បុគ្គលិករដ្ឋាភិបាលថៃ គឺជាអ្នកធ្វើការដូចមន្ត្រីរាជការដែរ ប៉ុន្តែពួកគេមិនបានឆ្លងកាត់ការប្រឡងចូលរដ្ឋទេ ហើយពួកគេក៏មិនទទួលបានប្រាក់សោធននិវត្តន៍ដែរ បន្ទាប់ពីចូលនិវត្តន៍៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ អតីតមេប៉ូលិស ថៃ ជំរុញឲ្យសមាជិកព្រឹទ្ធសភាបោះឆ្នោតជូនលោក Pita ធ្វើជានាយករដ្ឋមន្ត្រី