បក្សលោក Pita នៅតែចង់កែប្រែច្បាប់ប្រមាថព្រះមហាក្សត្រ ដើម្បីម្ចាស់ឆ្នោត

សមាជិកសភារបស់គណបក្សចលនាឆ្ពោះទៅមុខលោក Wiroj Lakkhanaadisorn បានបញ្ជាក់ថា បក្សចលនាឆ្ពោះទៅមុខដែលដឹកនាំដោយលោក Pita Limjaroensuk នឹងនៅតែជំរុញឲ្យមានវិសោធនកម្មច្បាប់ស្តីពីការប្រមាថព្រះមហាក្សត្រ ដោយសារតែគណបក្សរបស់ពួកគេបានសន្យានឹងធ្វើដូច្នេះ ក្នុងអំឡុងពេលយុទ្ធនាការឃោសនាបោះឆ្នោត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Wiroj បានសរសេរនៅលើបណ្តាញសង្គមថា “គណបក្សរបស់លោកនឹងរក្សាការសន្យាដែលធ្លាប់បានធ្វើចំពោះប្រជាជន បើមិនដូច្នេះទេ ម្ចាស់ឆ្នោតនឹងលែងគាំទ្រពួកគេទៀតហើយ ហើយប្រសិនបើយើងបំពានការសន្យាណាមួយ ដើម្បីឡើងកាន់អំណាចនោះ ប្រជាពលរដ្ឋដែលធ្លាប់នៅខាងយើង នឹងលែងទុកចិត្ត ក៏ដូចជាបោះបង់ចោលការគាំទ្រ ជាពិសេសម្ចាស់ឆ្នោតថែមទាំងជេរយើងថែមទៀតផង” ។

លោក Wiroj បានសន្យាថា ការធ្វើវិសោធនកម្មមាត្រាទី ១១២ នៃក្រមព្រហ្មទណ្ឌ ឬច្បាប់ប្រមាថព្រះមហាក្សត្រ នឹងត្រូវធ្វើឡើងដោយយកចិត្តទុកដាក់ ហើយគ្រប់ភាគីពាក់ព័ន្ធនឹងមានការលើកឡើងជាមតិយោបល់របស់ពួកគេផងដែរ ជាពិសេសបក្សចលនាឆ្ពោះទៅមុខ នឹងធ្វើវិសោធនកម្មនេះស្របតាមច្បាប់របស់សភា ប៉ុន្តែទោះជាយ៉ាងណា វាក៏ត្រូវការពេលវេលាផងដែរ ។

លោក Pita បានបរាជ័យក្នុងការបោះឆ្នោតជ្រើសរើសជានាយករដ្ឋមន្ត្រីថៃក្នុងជុំទី ១ នៅក្នុងសម័យប្រជុំរួមគ្នានៃរដ្ឋសភា និងព្រឹទ្ធសភាកាលពីថ្ងៃព្រហស្បតិ៍ ដោយទទួលបានសំឡេងត្រឹមតែ ៣២៤ ប៉ុណ្ណោះ ពោលមិនគ្រប់សំឡេង ៣៧៦ ឡើយដើម្បីក្លាយជានាយករដ្ឋមន្ត្រីនោះទេ ខណៈមានសំឡេងជំទាស់ចំនួន ១៨២ និងអនុបវាទ ១៩៩ ប៉ុន្តែទោះជាយ៉ាងណា សភានឹងរៀបចំការបោះឆ្នោតជុំបន្ទាប់ ដែលគ្រោងធ្វើឡើងនៅថ្ងៃទី១៩ ខែកក្កដានេះ ហើយអាច​នឹងមាន​បេក្ខជន​នាយក​រដ្ឋមន្ត្រី​មួយ​រូប​ទៀតដើម្បីធ្វើការប្រកួតប្រជែងផងដែរ ។

ទោះជាយ៉ាងនេះក្តី ប្រធានគណបក្សចលនាឆ្ពោះទៅមុខរូបនេះនិយាយថា លោកនឹងមិនចុះចាញ់ឡើយ ហើយបើពឹងតែគណបក្សរបស់លោកតែម្នាក់ឯងនោះ នឹងមិនអាចយកឈ្នះលើទឹកចិត្ត និងគំនិតរបស់សមាជិកព្រឹទ្ធសភានោះទេ លុះត្រាតែមានការគាំទ្រពីប្រជាជនថៃទាំងអស់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ លោក Pita នឹងចោលតំណែងនាយករដ្ឋមន្ត្រី បើនៅតែបរាជ័យក្នុងការ បោះឆ្នោតសភា