លោក ភីថា នឹងចោលតំណែងនាយករដ្ឋមន្ត្រី បើនៅតែបរាជ័យក្នុងការ​បោះឆ្នោតសភា

មេដឹកនាំគណបក្សចលនាឆ្ពោះទៅមុខលោក ភីថា លីមចារើនរ៉ាត់ បាននិយាយកាលពីថ្ងៃសៅរ៍ថា លោកត្រៀមខ្លួនរួចជាស្រេចក្នុងការបោះបង់តំណែងនាយករដ្ឋមន្ត្រី ហើយអនុញ្ញាតឲ្យគណបក្សភឿថៃ ក្នុងចំណោមគណបក្សចម្រុះទាំង ៨ ដឹកនាំបង្កើតរដ្ឋាភិបាលបន្ទាប់ ។

លោក ភីថា បានលើកឡើងថា លោកនឹងដើរចេញពីតំណែងមួយនេះ ប្រសិនបើលោកនៅតែបរាជ័យក្នុងការបោះឆ្នោតសភាជុំទី២ ដើម្បីជ្រើសរើសលោកជានាយករដ្ឋមន្ត្រី ឬធ្វើ​វិសោធនកម្ម​មាត្រា ២៧២ នៃ​រដ្ឋធម្មនុញ្ញ ដើម្បីដកហូតអំណាចសមាជិកព្រឹទ្ធសភា ហើយលោកថែមទាំងជំរុញឲ្យប្រជាជនទូទាំងប្រទេសថៃ ចូលរួមជាមួយលោកក្នុងយុទ្ធនាការដើម្បីយកឈ្នះលើបេះដូង និងចិត្តគំនិតរបស់សមាជិកព្រឹទ្ធសភាផងដែរ ។

លោក ភីថា បញ្ជាក់ថា “យើងមិនមានឱកាសច្រើនទៀតនោះទេ ប្រសិនបើយើងមិនអាចធ្វើឲ្យសមាជិកព្រឹទ្ធសភា ផ្លាស់ប្តូរចិត្តមកនៅជាមួយយើង” ខណៈលោកបានជំរុញឲ្យសារធារណជន ផ្ញើសារទៅកាន់សមាជិកព្រឹទ្ធសភាទាំងអស់តាមគ្រប់មធ្យោបាយដែលនឹកស្មានមិនដល់ ឲ្យគោរពតាមម្ចាស់ឆ្នោតទាំង ២៧ លាននាក់ ។

លោក ភីថា បានបរាជ័យក្នុងការបោះឆ្នោតជ្រើសរើសជានាយករដ្ឋមន្ត្រីថៃក្នុងជុំទី ១ នៅក្នុងសម័យប្រជុំរួមគ្នានៃរដ្ឋសភា និងព្រឹទ្ធសភាកាលពីថ្ងៃព្រហស្បតិ៍ ដោយទទួលបានសំឡេងត្រឹមតែ ៣២៤ ប៉ុណ្ណោះ ពោលមិនគ្រប់សំឡេង ៣៧៦ ឡើយដើម្បីក្លាយជានាយករដ្ឋមន្ត្រី ខណៈមានសំឡេងជំទាស់ចំនួន ១៨២ និងអនុបវាទ ១៩៩ ប៉ុន្តែទោះជាយ៉ាងណា សភានឹងរៀបចំការបោះឆ្នោតជុំបន្ទាប់ ដែលគ្រោងធ្វើឡើងនៅថ្ងៃទី១៩ ខែកក្កដានេះ ហើយអាច​នឹងមាន​បេក្ខជន​នាយក​រដ្ឋមន្ត្រី​មួយ​រូប​ទៀតដើម្បីធ្វើការប្រកួតប្រជែងផងដែរ ៕

ទោះជាយ៉ាងនេះក្តី ប្រធានគណបក្សចលនាឆ្ពោះទៅមុខរូបនេះនិយាយថា លោកនឹងមិនចុះចាញ់ឡើយ ហើយបើពឹងតែគណបក្សរបស់លោកតែម្នាក់ឯងនោះ នឹងមិនអាចយកឈ្នះលើទឹកចិត្ត និងគំនិតរបស់សមាជិកព្រឹទ្ធសភានោះទេ លុះត្រាតែមានការគាំទ្រពីប្រជាជនថៃទាំងអស់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ ៣ ចំណុចសំខាន់ៗអំពីរឿងរ៉ាវគ្រាប់បែកចង្កោមដែល អាមេរិក ផ្ដល់ទៅឲ្យ អ៊ុយក្រែន