ដូណាល់ ត្រាំ ថា លោកអាចជាប់ពន្ធនាគារ ៥៦១ឆ្នាំ

អតីតប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃពុធទី២ខែសីហាថា រដ្ឋាភិបាលពុករលួយ កំពុងព្យាយាមឃុំឃាំងគាត់រយៈពេលជាង ៥០០ ឆ្នាំ តាមរយៈការកាត់ទោសដែលជំរុញដោយរឿងនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីមែលរៃអង្គាសប្រាក់របស់លោក ត្រាំ ដែលត្រូវបានផ្សព្វផ្សាយជាសាធារណៈដោយសារព័ត៌មានអាមេរិកជាច្រើន មានខ្លឹមសារថា “ក្រសួងយុត្តិធម៌ដ៏ពុករលួយរបស់លោក ចូ បៃដិន បានចោទប្រកាន់អ្នកដោយខុសច្បាប់ម្តងហើយម្តងទៀត។ របាយការណ៍បង្ហាញថា ឥឡូវនេះ ខ្ញុំអាចប្រឈមមុខនឹងការជាប់ពន្ធនាគាររយៈពេល៥៦១ឆ្នាំ។ ការភ័យខ្លាចគឺថា ប្រសិនបើអ្នកបោះឆ្នោតឲ្យបេក្ខជនម្នាក់ដែលគិតដល់អ្នកជាចម្បងនោះ អ្នកក៏អាចត្រូវបានគេយាយី ចោទប្រកាន់ ហើយថែមទាំងត្រូវបានចាប់ខ្លួនដោយរបបម៉ាក្សនិយមបច្ចុប្បន្ន នៅទីក្រុងវ៉ាស៊ីនតោនទៀតផង”។

កាលពីថ្ងៃអង្គារ ទីប្រឹក្សាពិសេសលោក Jack Smith បានបញ្ចេញការចោទប្រកាន់៤៥ទំព័ររបស់មហាគណៈវិនិច្ឆ័យនៅទីក្រុងវ៉ាស៊ីនតោនឌីស៊ី លើការចោទប្រកាន់ចំនួន៦ករណី ពាក់ព័ន្ធនឹងកុបកម្មថ្ងៃទី៦ខែមករាឆ្នាំ២០២១ នៅវិមានកាពីតូលសហរដ្ឋអាមេរិក។

យោងតាមលោក Smith, លោក ត្រាំ ដឹងថាការអះអាងរបស់គាត់អំពីភាពមិនប្រក្រតីនៅក្នុងការបោះឆ្នោតឆ្នាំ២០២០គឺមិនពិត ប៉ុន្តែនៅតែនិយាយវាឡើង ដូច្នេះបង្កើតឲ្យមានបរិយាកាសនៃការមិនទុកចិត្តនិងកំហឹងទូទាំងប្រទេសយ៉ាងខ្លាំងក្លា ហើយបំផ្លាញជំនឿរបស់សាធារណៈជន លើមន្ត្រីគ្រប់គ្រងការបោះឆ្នោត។

បច្ចុប្បន្នលោក ត្រាំ គឺជាបេក្ខជនឈានមុខគេ សម្រាប់ការតែងតាំងទៅបោះឆ្នោតប្រធានាធិបតីឆ្នាំ២០២៤ នៅខាងសាធារណរដ្ឋ ហើយលោក ក៏ជាបេក្ខជនដែលគេរំពឹងថា នឹងឈ្នះឆ្នោតក្លាយជាប្រធានាធិបតីសហរដ្ឋអាមេរិក ផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ដូណាល់ ត្រាំ រងការចោទប្រកាន់ ៤ករណីទៀត