លោក Modi ប្ដេជ្ញានាំ ឥណ្ឌា ក្លាយជាប្រទេសសេដ្ឋកិច្ចលំដាប់ទី ៣ លើពិភពលោក

នៅក្នុងទិវាឯករាជ្យជាតិលើកទី ៧៧​ របស់ឥណ្ឌា លោកនាយករដ្ឋមន្ត្រី​ Narendra Modi បញ្ជាក់ថា នឹងប្តេជ្ញាដឹកនាំការអភិវឌ្ឍសេដ្ឋកិច្ចរបស់ឥណ្ឌាឲ្យកាន់តែមានភាពរីកចម្រើន​ស្ថិតនៅក្នុងចំណោមកំពូលទាំង ៣ នៃសេដ្ឋកិច្ចពិភពលោកនៅពេល ៥ ឆ្នាំបន្ទាប់ ។

បច្ចុប្បន្ន ឥណ្ឌាជាប្រទេស​មានសេដ្ឋកិច្ច ៣.៥ ពាន់ពាន់លានដុល្លារ ដែលបានវ៉ាដាច់ចក្រភពអង់គ្លេសកាលពីឆ្នាំមុន ដើម្បីក្លាយជាប្រទេសសេដ្ឋកិច្ចធំជាងគេទី៤ ។

ទន្ទឹមនេះ លោក Modi និយាយថា ឥណ្ឌា ជាប្រទេសមានប្រជាជនពូកែខ្លាំ​ងទៅលើបច្ចេកទេសព័ត៌មានបច្ចេកវិទ្យា (IT) និងបច្ចេកវិទ្យាទំនើបផ្សេងៗ ស្របពេលបច្ចុប្បន្នពិភពលោកក៏កំពុងតែប្រកួតប្រជែងគ្នាខ្លាំងផងដែរទៅលើប្រព័ន្ធបច្ចេកវិទ្យា ខណៈឥណ្ឌាក៏សំបូរអ្នកមានទេពកោសល្យបែបនេះស្រាប់ផង ។  

ស្របពេលជាមួយគ្នានេះ ឥណ្ឌាក៏ជាប្រទេស​ដែលមានប្រជាជនភាគច្រើន មានអាយុស្ថិតនៅក្រោម ៣០ ឆ្នាំផងដែរ ហេតុដូចនេះ ឥណ្ឌាមានកម្លាំង​ពលកម្មច្រើនគ្រប់គ្រាន់ដែលអា​ចជួយជំរុញសេដ្ឋកិច្ច​ប្រទេសឲ្យមានកំណើនប្រកួតប្រជែងនេះបាន ។

ជាចុងក្រោយលោក Modi ដាក់ក្ដីសង្ឃឹមថា នៅពេលដែលឥណ្ឌារៀបចំខួប ១០០ ឆ្នាំនៃឯករាជ្យភាពនាឆ្នាំ ២០៤៧​ នោះឥណ្ឌានឹងប្រារព្ធពិធីនោះឡើងក្នុងនាមជាប្រទេសអភិវឌ្ឍន៍ ដោយសារតែអ្នកមានទេព្យកោសលវ័យក្មេងបានចូលរួមក្នុងការអភិវឌ្ឍន៍សេដ្ឋកិច្ចចាប់ពីពេលនេះតទៅ ៕

ប្រែសម្រួល៖​ នាង រតនៈ

ប្រភព៖ Independent