អនុប្រធានាធិបតីតៃវ៉ាន់ ឆ្លើយតបទៅការគំរាមរបស់ចិន

ក្នុងអំឡុងពេលធ្វើដំណើរទៅកាន់ប្រទេសប៉ារ៉ាហ្គាយ អនុប្រធានាធិបតីតៃវ៉ាន់ លោក William Lai បាននិយាយថា រាល់សកម្មភាពយោធារបស់ចិន ឆ្លើយតបទៅនឹងការឈប់សំចតរបស់លោកនៅសហរដ្ឋអាមេរិក នឹងក្លាយជាការប៉ុនប៉ងរបស់ទីក្រុងប៉េកាំង ដើម្បីជ្រៀតជ្រែកក្នុងការបោះឆ្នោតរបស់កោះនេះនៅឆ្នាំក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីតៃវ៉ាន់និយាយថា ប្រទេសចិន អាចចាប់ផ្តើមសមយុទ្ធយោធានៅសប្តាហ៍នេះ ដោយប្រើការឈប់សំចតរបស់លោក Lai នៅសហរដ្ឋអាមេរិក ជាលេសដើម្បីបំភិតបំភ័យអ្នកបោះឆ្នោត និងធ្វើឲ្យពួកគេភ័យខ្លាចសង្គ្រាម។

ថ្លែងទៅកាន់អ្នកសារព័ត៌មានកាលពីថ្ងៃអង្គារទី១៥ខែសីហា នៅប្រទេសប៉ារ៉ាហ្គាយ ក្រោយចាកចេញពីទីក្រុងញូវយ៉ក, លោក Lai និយាយថា ការឆ្លងកាត់សហរដ្ឋអាមេរិកបែបនេះ គឺជាទម្លាប់ទៅហើយ ហើយប្រទេសចិន គ្មានហេតុផលណាមួយដើម្បីយកវាជាលេសដើម្បីបំភិតបំភ័យដោយពាក្យសម្ដីនិងយោធាលើកោះតៃវ៉ាន់នោះទេ។

លោក Lai បន្តថា “ប្រសិនបើប្រទេសចិន ប្រើការឈប់សំចតនេះ ជាលេសដើម្បីចាប់ផ្តើមការបំភិតបំភ័យដោយពាក្យសម្តីនិងយោធា ឬវិធីសាស្រ្តគំរាមកំហែងផ្សេងទៀតមែននោះ វាគ្រាន់តែលាតត្រដាងដល់ប្រព័ន្ធផ្សព្វផ្សាយអន្តរជាតិថា ប្រទេសចិន កំពុងព្យាយាមធ្វើអន្តរាគមន៍ក្នុងការបោះឆ្នោតរបស់តៃវ៉ាន់ ជាមួយនឹងការគំរាមកំហែងផ្នែកយោធាប៉ុណ្ណោះ”។

គួរបញ្ជាក់ថា បច្ចុប្បន្ន លោក Lai គឺជាបេក្ខជននាំមុខគេ ឈានទៅរកការឈ្នះឆ្នោតប្រធានាធិបតី នៅខែមករា ឆ្នាំ២០២៤ ខណៈលោក Lai ក៏គូសបញ្ជាក់​ផងដែរថា លោក​មាន​ទំនុក​ចិត្ត ​លើ​ប្រជាជន​តៃវ៉ាន់ ៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន ព្រមានសងសឹកចាស់ដៃ ក្រោយអនុប្រធានាធិបតីតៃវ៉ាន់ ធ្វើ​ទស្សនកិច្ច​ អាមេរិក