មកដឹងមូលហេតុដែលលោក សេតថា មិនចូលរួមកិច្ចប្រជុំកំពូល អាស៊ាន នៅ ឥណ្ឌូណេស៊ី

នាយករដ្ឋមន្ត្រីថ្មីរបស់ថៃលោក សេតថា ថាវីស៊ីន នឹងមិនអញ្ជើញចូលរួមកិច្ចប្រជុំកំពូលអាស៊ានលើកទី ៤៣ និងកិច្ចប្រជុំពាក់ព័ន្ធដែលរៀបចំឡើងនៅទីក្រុងហ្សាការតា ប្រទេសឥណ្ឌូណេស៊ី ចាប់ពីថ្ងៃទី៥ ដល់ថ្ងៃទី៧ ខែកញ្ញា នេះនោះទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកមូលហេតុដែលលោក សេតថា មិនចូលរួមកិច្ចប្រជុំកំពូលអាស៊ាននេះដែរ គឺដោយសារតែរដ្ឋាភិបាលរបស់នាយករដ្ឋមន្ត្រីដែលទើបជាប់ឆ្នោតថ្មីរូបនេះ មិនទាន់បានស្បថចូលកាន់តំណែងនៅចំពោះព្រះភក្រ្តព្រះមហាក្សត្រ និងធ្វើសេចក្ដីថ្លែងការណ៍ពីគោលនយោបាយទៅកាន់សភានៅឡើយទេ ។

ទោះយ៉ាងណា គណៈប្រតិភូថៃដែលត្រូវចូលរួមកិច្ចប្រជុំទាំងអស់នៅទីក្រុងហ្សាការតា ប្រទេសឥណ្ឌូណេស៊ី នឹងដឹកនាំដោយលោក Sarun Charoensuwan ដែលជាលេខាធិការអចិន្ត្រៃយ៍ទទួលបន្ទុកកិច្ចការបរទេស ។

គួរបញ្ជាកថា មេដឹកនាំអាស៊ានដែលដឹកនាំដោយលោកប្រធានាធិបតីឥណ្ឌូណេស៊ី Joko Widodo នឹងជួបពិភាក្សាគ្នានៅក្នុងកិច្ចប្រជុំកំពូលលើកទី ៤៣ ជាមួយនឹងការឡោមព័ទ្ធដោយបញ្ហាចាក់ស្រេះចំពោះមុខ និងមិនទាន់មានដំណោះស្រាយចំនួន ៣ ដូចជា ជម្លោះស៊ីវិលដ៏រ៉ាំរ៉ៃរបស់ប្រទេសមីយ៉ាន់ម៉ា ការផ្ទុះភាពតានតឹងជាថ្មីនៅសមុទ្រចិនខាងត្បូង និងការប្រកួតប្រជែងដ៏យូរអង្វែងរវាងចិន និងសហរដ្ឋអាមេរិកជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ កិច្ចប្រជុំកំពូល អាស៊ាន នៅ ឥណ្ឌូណេស៊ី នឹងលើកយកបញ្ហាចាក់ស្រេះចំនួន ៣ មកដោះស្រាយ