លោក សេតថា ចាប់ផ្តើមអនុវត្ត ការចុះថ្លៃអគ្គិសនីនិងប្រេងម៉ាស៊ូត ជូនប្រជាជនថៃ

នាយករដ្ឋមន្ត្រីថៃ លោក សេតថា ថាវីស៊ីន បានប្រាប់អ្នកសារព័ត៌មានបន្ទាប់ពីកិច្ចប្រជុំគណៈរដ្ឋមន្ត្រីលើកដំបូងរបស់ខ្លួនថា គណៈរដ្ឋមន្ត្រីបានសម្រេចនៅថ្ងៃពុធទី១៣ខែកញ្ញា ក្នុងការចុះថ្លៃអគ្គិសនីពី ៤.៤៥ បាត មក ៤.១០ បាត ក្នុងមួយគីឡូវ៉ាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្ថែមថា គណៈរដ្ឋមន្ត្រី ក៏បានសម្រេចកាត់បន្ថយតម្លៃប្រេងម៉ាស៊ូតមកនៅក្រោម ៣០បាតក្នុងមួយលីត្រផងដែរ ចាប់ពីថ្ងៃទី២០ខែកញ្ញាទៅ។

ទោះបីជាយ៉ាងណាក៏ដោយ មិន​មាន​ព័ត៌មាន​លម្អិត​អំពីថាតើ រាជ​រដ្ឋាភិបាល​នឹង​ឧបត្ថម្ភធន​លើ​ការ​កាត់​បន្ថយ​តម្លៃ​ទាំងនេះដោយរបៀបណា ឬ​ថាតើ ​ការចុះថ្លៃ​នេះ​នឹង​មាន​រយៈពេល​ប៉ុនណានោះ​ទេ។

គួរបញ្ជាក់ថា ការចុះ​ថ្លៃ​អគ្គិសនីនិង​ប្រេង ​គឺ​ស្ថិត​ក្នុង​ចំណោម​គោល​នយោបាយ​អាទិភាព​ខ្ពស់​បំផុត ​ដែល​ដាក់ចេញ​ដោយ​គណបក្ស​ភឿថៃ​ ក្នុង​យុទ្ធនាការឃោសនាបោះ​ឆ្នោត​របស់​ខ្លួន។

លើសពីនេះ គណៈរដ្ឋមន្ត្រី ក៏បានសម្រេចចិត្តបើកប្រាក់ខែមន្ត្រីរាជការ មួយខែពីរដងផងដែរ ដើម្បីសម្រាលបន្ទុកហិរញ្ញវត្ថុរបស់ពួកគេ។

ក្រៅពីបញ្ហាខាងលើ លោក សេតថា ក៏ប្រកាសដែរថា នៅត្រីមាសទីបួនឆ្នាំនេះ រដ្ឋាភិបាល នឹងអនុវត្តការផ្អាកសងបំណុលរបស់កសិករ ដែលការផ្អាកនេះគឺគិតទាំងប្រាក់ដើម និងការប្រាក់។

ទន្ទឹមនឹងការអនុវត្តគម្រោងពន្យារពេលសងបំណុលនេះ លោក សេតថា សង្កត់ធ្ងន់ថា រដ្ឋាភិបាលថៃ ក៏នឹងលើកកម្ពស់ការចែករំលែកចំណេះដឹង និងការប្រើប្រាស់បច្ចេកវិទ្យាផងដែរ ដើម្បីឲ្យកសិករ អាចកាត់បន្ថយការចំណាយ និងបង្កើនប្រាក់ចំណូលរបស់ពួកគេ៕

ប្រែសម្រួល៖ Vann Vann

ប្រភព៖ Thai PBS

ចុចអាន៖ ថៃ ប្រកាសអនុវត្តវិធានការ ឲ្យកសិករផ្អាកសងបំណុល នៅចុងឆ្នាំនេះ