អ្នកវិទ្យាសាស្ត្រកំពុងស្រាយអាថ៌កំបាំងមច្ឆាក្បាលស្វានៅ ជប៉ុន

សាកសពម៉ាំមីដែលគេជឿថាជាមច្ឆាខ្លួនស្វា ដៃល្មូន និងកន្ទុយត្រី កំពុងត្រូវបានស៊ើបអង្កេតដោយអ្នកវិទ្យាសាស្ត្រក្នុងគោលបំណងស្រាយអាថ៌កំបាំង ។

វាត្រូវបានគេនាំយកពីប្រទេសជប៉ុនដោយនាវិកជនជាតិអាមេរិក ហើយបរិច្ចាគទៅឲ្យវិទ្យាស្ថានសង្គមប្រវត្តិសាស្ត្រ Clark County នៅទីក្រុង Springfield រដ្ឋ Ohio ក្នុងឆ្នាំ ១៩០៦ ។ ក្រោយមក គេធ្វើការថតកាំរស្មីអ៊ិច និង CT ស្កេនជាលើកដំបូង ដើម្បីបកស្រាយពីធម្មជាតិពិតរបស់វា ។

លោក Joseph Cress អ្នកឯកទេសខាងវិទ្យុសកម្មនៅសាកលវិទ្យាល័យ Northern Kentucky បាននិយាយថា “ពីខាងក្រៅ វាហាក់ដូចជាការលាយបញ្ចូលគ្នាដ៏ច្របូកច្របល់នៃសត្វបីប្រភេទផ្សេងគ្នា ដោយសារតែមានក្បាល និងដងខ្លួនជាស្វា ដៃដូចក្រពើ ឬល្មូនម្យ៉ាង ជាមួយនឹងកន្ទុយត្រី” ។

ស្រដៀងមច្ឆាខាងលើដែរ នៅប្រាសាទមួយក្នុង Asakuchi មានមច្ឆាមួយក្បាលដែលត្រូវគេគោរពបូជា ទោះបីដឹងថាវាធ្វើពីក្រណាត់ ក្រដាស និងរោមសត្វក៏ដោយ ។ បើតាមរឿងព្រេងប្រទេសជប៉ុនបានឲ្យដឹងថា អ្នកដែលហូបសាច់មច្ឆានឹងមានជីវិតអមតៈទៀតផង ។

ទិន្នន័យការស្កែន CT របស់មច្ឆាក្បាលស្វានឹងផ្ញើទៅអ្នកជំនាញនៅសួនសត្វ Cincinnati និង Newport Aquarium ដើម្បីអាចកំណត់អត្តសញ្ញាណសត្វពិតប្រាកដណាមួយ ៕

ប្រែសម្រួល៖ វារី

ប្រភព៖ Dailymail

ចុចអាន៖ អ្នកវិទ្យាសាស្ត្រលាតត្រដាងការពិតពី សាកសពមច្ឆា នៅប្រទេសជប៉ុន