កាលពីឆ្នាំ ២០២២ អ្នកស្រាវជ្រាវរកឃើញម៉ាំមីមច្ឆាប្រវែង ៣០.៥ សង់ទីម៉ែត្រដែលរក្សាទុកក្នុងប្រអប់ឈើក្នុងវត្តមួយនៅខេត្តអូកាយ៉ាម៉ា ប្រទេសជប៉ុន ហើយពួកគេសន្និដ្ឋានថាវាជាការដេរភ្ជាប់រវាងខ្លួនស្វាទៅនឹងខ្លួនត្រី ។

ក្នុងប្រអប់នោះមានសំបុត្រមួយសរសេរពីការចាប់បានដោយអ្នកនេសាទម្នាក់ចន្លោះឆ្នាំ១៧៣៦ – ១៧៤១ តាមពិតជាង ៤០ ឆ្នាំមុន ម៉ាំមីមច្ឆានោះត្រូវគេបង្កើតឡើងតំណាងឲ្យ Ningyo ដែលជាភាវៈក្នុងទេវកថារបស់ប្រទេសជប៉ុន ដើម្បីទុកគោរពបូជាសូមសេចក្ដីសុខ ព្យាបាលរោគ និងអាយុវែងសោះ ។ 

ថ្ងៃទី០៧ ខែកុម្ភៈ ឆ្នាំ ២០២៣ ក្រុមអ្នកស្រាវជ្រាវមកពីសាកលវិទ្យាល័យ វិទ្យាសាស្ត្រ និងសិល្បៈ Kurashiki (KUSA) ក្នុងប្រទេសជប៉ុនបានលាតត្រដាងការពិតពីក្រោយសាកសព Ningyo ខាងលើ លទ្ធផលគឺដងខ្លួនវាធ្វើពីក្រណាត់ ក្រដាស កប្បាស និងលាបពណ៌ដោយល្បាយខ្សាច់ជាមួយធ្យូង ចំណែកផ្នែកខាងក្រៅគ្របដណ្ដប់ដោយស្បែកសត្វផ្សេងៗច្រើនប្រភេទដូចជាត្រី ធ្វើឲ្យអ្នកស្រាវជ្រាវភ័ន្តច្រឡំ ។

ដូច្នេះការវិភាគថ្មីបញ្ជាក់ច្បាស់ៗថា មច្ឆានេះគឺបង្កើតឡើងយ៉ាងម៉ត់ចត់ដើម្បីបញ្ឆោតមនុស្សឱ្យជឿលើ Ningyo និងភាពសាកសិទ្ធិរបស់វា ៕

ប្រែសម្រួល ៖ វារី

ប្រភព ៖ livescience

ចុចអាន ៖ មកស្គាល់នាងមច្ឆាទាំង ១២ ប្រភេទ ខុសៗគ្នា ក្នុងទេវកថាចម្រុះ