អាមេរិក ត្រៀមផលិតអាវុធនុយក្លេអ៊ែរថ្មី ដែលខ្លាំងជាងគ្រាប់បែកទម្លាក់នៅ ហ៊ីរ៉ូស៊ីម៉ា ២៤ដង

មន្ទីរបញ្ចកោណ បានប្រកាសផែនការផលិតគ្រាប់បែកនុយក្លេអ៊ែរថ្មី ដែលមានកម្លាំងខ្លាំងជាងគ្រាប់បែកដែលទម្លាក់លើទីក្រុងហ៊ីរ៉ូស៊ីម៉ា ក្នុងឆ្នាំ១៩៤៥ ដល់ទៅ២៤ដងឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះកើតឡើងប៉ុន្មានថ្ងៃ បន្ទាប់ពីមានរបាយការណ៍ថា ប្រទេសចិន គ្រោងបង្កើនឃ្លាំងអាវុធនុយក្លេអ៊ែររបស់ខ្លួនដល់ទៅទ្វេដង ពោលគឺឈានដល់លើស១០០០គ្រាប់ នៅត្រឹមឆ្នាំ២០៣០។

គ្រាប់បែកទំនាញនុយក្លេអ៊ែរ B61-13 ប្រភេទថ្មីនេះ នឹងត្រូវទម្លាក់ចេញពីយន្តហោះទម្លាក់គ្រាប់បែកបំបាំងកាយ B-21 Raider តម្លៃ៦៩២លានដុល្លារ ដែលបច្ចុប្បន្ន យន្តហោះប្រភេទនេះ ក៏កំពុងស្ថិតក្នុងការអភិវឌ្ឍដែរ។

យ៉ាងណាក្តី សព្វាវុធ​ថ្មី​នេះ ​ត្រូវតែទទួលបានការអនុម័តដោយ​សភាទាំងពីរជាមុនសិន ប៉ុន្តែ​គេបានមើលឃើញថា វាមានសញ្ញានៃការយល់ព្រមពីសំណាក់អ្នកសាធារណរដ្ឋរួចទៅហើយ។

មន្ទីរបញ្ចកោណនិយាយថា “B61-13 នឹងកំញើញដល់សត្រូវ ហើយផ្តល់ការធានាដល់សម្ព័ន្ធមិត្តនិងដៃគូថាប្រធានាធិបតីអាមេរិក មានជម្រើសក្នុងការកំណត់គោលដៅយោធា នៅកន្លែងពិបាកៗនិងកន្លែងធំៗ”។

អាវុធនេះ គឺជាប្រភេទគ្រាប់បែកទំនាញ B61 ស៊េរីចុងក្រោយបង្អស់ ដែលជាផ្នែកនៃផែនការនុយក្លេអ៊ែរដ៏សំខាន់ របស់សហរដ្ឋអាមេរិក ចាប់តាំងពីសង្គ្រាមត្រជាក់មក។

វានឹងមានកម្លាំងអតិបរមា៣៦០គីឡូតោន ខណៈគ្រាប់បែកដែលទម្លាក់លើទីក្រុងហ៊ីរ៉ូស៊ីម៉ារបស់ប្រទេសជប៉ុននៅថ្ងៃទី៦ខែសីហាឆ្នាំ១៩៤៥ មានកម្លាំងត្រឹម១៥គីឡូតោនប៉ុណ្ណោះ។ 

នេះមានន័យថា B61-13 មានកម្លាំងខ្លាំងជាង គ្រាប់បែកទម្លាក់លើទីក្រុងហ៊ីរ៉ូស៊ី ដល់ទៅ២៤ដងឯណោះ។ ដោយឡែក គ្រាប់បែកដែលទម្លាក់លើទីក្រុងណាហ្គាសាគី នៅបីថ្ងៃក្រោយនោះ គឺមានកម្លាំងប្រហែល២៥គីឡូតោន។

សូមបញ្ជាក់ថា បច្ចុប្បន្ន សហរដ្ឋអាមេរិកមានក្បាលគ្រាប់នុយក្លេអ៊ែរប្រហែល៣៧០០គ្រាប់ ដោយក្នុងនោះ មាន១៤១៩គ្រាប់ បានដាក់ពង្រាយរួចទៅហើយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ តើអ្នកដឹងទេ? មួយនាទី ពិភពលោកចំណាយប្រាក់ ១៥៦ ៨៤២ដុល្លារ លើអាវុធ នុយក្លេអ៊ែរ