ព័ត៌មានអន្ដរជាតិ

រញ្ជួយដីនៅ នេប៉ាល់ ខណៈអ្នកស្លាប់ឡើងដល់ ១៥៧នាក់និងរបួសជាច្រើន

បានផុស

៨ ខែ មុន

នៅ

ថ្ងៃអាទិត្យ ៥ វិច្ឆិកា ២០២៣

ដោយ

អាជ្ញាធរនេប៉ាល់និយាយថា គ្រោះរញ្ជួយដីដ៏ខ្លាំងក្លាមួយវាយប្រហារភាគខាងលិចនៃប្រទេស ហើយបានសម្លាប់មនុស្សយ៉ាងហោចណាស់១៤០នាក់និងរបួសជាច្រើន ខណៈពេលនេះអ្នកស្លាប់កើនដល់ ១៥៧នាក់។

អាជ្ញាធរនេប៉ាល់ប៉ាន់បានស្មានថា គ្រោះរញ្ជួយដីនេះវាមានកម្លាំង ៥,៦ រ៉ិចទ័រ ស្តិតនៅចំណុចកណ្តាល Jajarkot និងតំបន់ជុំវិញ ដោយមានចម្ងាយប្រហែល៣០០គីឡូម៉ែត្រភាគពាយព្យនៃរដ្ឋធានី Kathmandu។ ស្របពេលដែល រញ្ជួយដីក៏មាននៅផ្នែកខ្លះនៃភាគខាងជើងប្រទេសឥណ្ឌា រួមទាំងរដ្ឋធានីញូវដែលីផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីមូលដ្ឋាននិយាយទៀតថា កាលពីថ្ងៃសុក្រទី៣ខែវិច្ឆិកា អ្នកស្លាប់ត្រឹមតែ១២៨នាក់និងមានអ្នករបួសតិចតួច។ក្រោយមកក្រុមអ្នកជួយសង្គ្រោះកំពុងព្យាយាមរំដោះមនុស្សដែលជាប់នៅក្រោមគំនរបាក់បែក និងរកឃើញអ្នកស្លាប់កើនឡើងដល់១៥៧នាក់។

ទោះជាយ៉ាងណាក៏ដោយ នាយករដ្ឋមន្រ្តីនេប៉ាល់ Pushpa Kamal Dahal មិននៅស្ងៀមឡើយ ដោយលោកបានសម្តែងការសោកស្តាយចំពោះការបាត់បង់អាយុជីវិត។ លោកបានចល័តភ្នាក់ងារសន្តិសុខទាំងអស់របស់ប្រទេសដើម្បីជួយសង្គ្រោះ ហើយកាលពីព្រឹកថ្ងៃសៅរ៍ លោកក៏បានធ្វើដំណើរទៅកាន់កន្លែងកើតហេតុទៀតផង។

សូមរម្លឹកដែរថា ប្រទេសនេះធ្លាប់រងគ្រោះដោយការរញ្ជួយដីកម្រិត ៧.៨ រិចទ័រក្នុងឆ្នាំ ២០១៥ ដែលបានសម្លាប់មនុស្សជិត ៩ ០០០ នាក់ និងបំផ្លាញផ្ទះជាងកន្លះលានខ្នង។ ហើយកាលពីឆ្នាំមុន មនុស្ស ៦ នាក់បានស្លាប់បន្ទាប់ពីការរញ្ជួយដីកម្រិត ៥.៦ រិចទ័រវាយប្រហារស្រុក Doti ជិត Jajarkot ៕