រញ្ជួយដីនៅនេប៉ាល់ សម្លាប់មនុស្សជាង ១០០នាក់

មនុស្ស១២៨នាក់បានស្លាប់ បន្ទាប់ពីគ្រោះរញ្ជួយដីកម្រិត៥.៦រ៉ិចទ័រ វាយប្រហារភាគខាងលិចប្រទេសនេប៉ាល់ កាលពីថ្ងៃសុក្រទី៣ខែវិច្ឆិកា។ ទន្ទឹមនោះ អ្នកនាំពាក្យកងទ័ពនិយាយថា មនុស្សជាង១០០នាក់ ក៏ត្រូវរបួសផងដែរ។

តាមការបញ្ជាក់ពីមជ្ឈមណ្ឌលតាមដាននិងស្រាវជ្រាវរបស់ប្រទេសនេប៉ាល់, ការរញ្ជួយដី ត្រូវបានកត់ត្រានៅម៉ោង ២៣:៤៧ នាទីជាមួយជម្រៅរាក់។

កងកម្លាំងសន្តិសុខ ត្រូវបានដាក់ពង្រាយ ដើម្បីជួយដល់កិច្ចខិតខំប្រឹងប្រែងសង្គ្រោះក្នុងស្រុក Jajarkot និង West Rukum នៃខេត្ត Karnali ដែលមានចម្ងាយប្រហែល៥០០គីឡូម៉ែត្រ ភាគខាងលិចរដ្ឋធានី កដ្ឋមណ្ឌូ។

ទោះបីជាយ៉ាងណាក៏ដោយ ប្រតិបត្តិការ​ស្វែងរកនិង​ជួយ​សង្គ្រោះ ​កំពុងជួបឧបសគ្គ​ដោយសារតែ​ផ្លូវត្រូវរារាំង​ដោយបំណាក់ដី ​ដែល​បង្ក​ឡើង​ដោយ​ការ​រញ្ជួយ​។

សូមបញ្ជាក់ថា ប្រទេសនេប៉ាល់ គឺស្ថិតនៅតាមបណ្តោយជួរភ្នំហិមាល័យ ជាកន្លែងដែលមានសកម្មភាពរញ្ជួយដីញឹកញាប់។

កាល​ពី​ខែ​មុន ការ​រញ្ជួយ​ដី​កម្រិត៦.៣រ៉ិចទ័រ ​ត្រូវ​បាន​កត់ត្រា​នៅ​ក្នុង​ស្រុក Bajhang ភាគ​ខាង​លិច ដែល​បណ្តាល​ឲ្យ​មាន​អ្នក​របួសជាច្រើន។

ក្នុងឆ្នាំ២០១៥ ប្រទេសនេះបានទទួលរងការរញ្ជួយដីដ៏សាហាវចំនួនពីរលើក ដែលក្នុងនោះមនុស្ស ៩០០០នាក់ត្រូវបាត់បង់ជីវិតនិង២២៣០៩នាក់ រងរបួស៕

ប្រែសម្រួល៖ Vann Vann

ប្រភព៖ BBC

ចុចអាន៖ អាហ្វហ្គានីស្ថាន ជួបគ្រោះរញ្ជួយដីខ្លាំងក្លាមួយទៀត បន្ទាប់ពីការរញ្ជួយលើកមុន សម្លាប់មនុស្សជាង ២៤០០នាក់