ម្ចាស់ Miss Universe ថៃ ដាក់ឯកសារប្រកាស​ក្ស័យធន ក្រោយទិញកម្មវិធីអស់ ២០ លានដុល្លារ

ម្ចាស់កម្មវិធី Miss Universe ថៃ ដែលធ្លាប់ជាផ្នែកនៃអាណាចក្រជំនួញរបស់អតីតប្រធានាធិបតីអាមេរិក Donald Trump បានដាក់​ឯកសារប្រកាស​ក្ស័យធន បន្ទាប់ពីទិញកម្មវិធីអស់រយៈពេល ១ ឆ្នាំក្នុងតម្លៃ ២០ លានដុល្លារ ។

នាយកប្រតិបត្តិរបស់ក្រុមហ៊ុន JKN Global Group ដែលទិញកម្មវិធី Miss Universe គឺឈ្មោះ Anne Jakapong Jakrajutatip ជាស្ត្រីកែភេទ ។

ពេលនេះក្រុមហ៊ុនពោរពេញដោយបំណុល ប៉ុន្តែពួកគេនិយាយថានឹងព្យាយាមដោះស្រាយបញ្ហាលុយកាក់ ទោះជាយ៉ាងណាក៏ដោយ ក្រុមហ៊ុន JKN មិនបានសងបំណុល ១២ លានដុល្លារ ដែលផុតកំណត់តាំងពីថ្ងៃទី១ ខែកញ្ញា មកម្ល៉េះ ។

កាលពីឆ្នាំ ២០២២ ទៀតសោត តម្លៃភាគហ៊ុនរបស់ JKN បានធ្លាក់ចុះជាង ៨០ ភាគរយឯណោះ ។ ដូច្នេះតុលាការ​ក្ស័យធន​ថៃ​បាន​កំណត់​ថ្ងៃ​បើក​សវនាការ​ លើ​ញត្តិ​សម្រាប់​ការ​ស្តារ​អាជីវកម្ម​ឡើង​វិញ​នៅ​ថ្ងៃ​ទី ២៩ ខែ​មករា ឆ្នាំ ២០២៤ ។

ចាប់ពីឆ្នាំនេះទៅ ក្រោមកម្មសិទ្ធិរបស់ JKN ការប្រកួត Miss Universe បានអនុញ្ញាតឲ្យស្ត្រីមានកូន ឬរៀបការរួចដាក់ពាក្យចូលរួមទាំងអស់គ្នា ។

គួរឲ្យដឹងថា អង្គការ​ Miss Universe ក៏ធ្លាប់គ្រប់គ្រងដោយលោកអតីតប្រធានាធិបតីអាមេរិក Donald Trump​ ពី​ឆ្នាំ ១៩៩៦ ដល់​ឆ្នាំ ២០១៥ ដែរ ។ ប៉ុន្តែគាត់បានលក់ក្រុមហ៊ុនចេញ បន្ទាប់ពីដៃគូទូរទស្សន៍ ២ និយាយថា ពួកគេនឹងមិនចាក់ផ្សាយកម្មវិធីប្រកួតនេះទៀតទេ ព្រោះលោក Trump ធ្វើការអត្ថាធិប្បាយអំពីជនអន្តោប្រវេសន៍ខុសច្បាប់ក្នុងយុទ្ធនាការប្រធានាធិបតីឆ្នាំ ២០១៦ ៕

ប្រែសម្រួល៖ វារី

ប្រភព៖ BBC

ចុចអាន៖ មេ Miss Universe ប្ដឹងអ្នកចោទថា កម្មវិធីបវរកញ្ញាចក្រវាលលុបការប្រកួតចោល ដោយសារក្ស័យធន