ចំណាប់ខ្មាំង ប៉ាឡេស្ទីន មួយចំនួនដែល អ៊ីស្រាអែល ដោះលែងធ្លាប់មាន​ប្រវត្តិចាក់សម្លាប់មនុស្ស

បើយោងតាមវិទ្យុកងទ័ពអ៊ីស្រាអែលបានឲ្យដឹងថា ពលរដ្ឋប៉ាឡេស្ទីនដែលអ៊ីស្រាអែលត្រូវបានដោះលែងកាលពីថ្ងៃសុក្រ រួមមានទាំងអ្នកទោសដែលធ្លាប់មានប្រវត្តិប្រព្រឹត្តការវាយប្រហារចាក់សម្លាប់ជនជាតិអ៊ីស្រាអែល ខណៈអ្នកមួយចំនួនទៀតមកពីទីក្រុងហ្សេរុយសាឡឹមខាងកើត ។

នេះគឺជាក្រុមដំបូងក្នុងចំណោមអ្នកទោសសន្តិសុខយ៉ាងហោចណាស់ ១៥០ នាក់ ដែលត្រូវបានកំណត់សម្រាប់ការដោះលែងនៅក្នុងរយៈពេលប៉ុន្មានថ្ងៃនេះ ហើយក៏ជាផ្នែកមួយនៃកិច្ចព្រមព្រៀងជាមួយក្រុមប្រដាប់អាវុធប៉ាឡេស្ទីនហាម៉ាសសម្រាប់ការដោះលែងចំណាប់ខ្មាំងយ៉ាងហោចណាស់ ៥០ នាក់ និងបទឈប់បាញ់រយៈពេល ៤ ថ្ងៃនៅតំបន់ហ្គាហ្សា ។

កិច្ចព្រមព្រៀងជាបណ្ដោះអាសន្ននូវបទឈប់បាញ់ ក៏ដូចជាការដោះលែងចំណាប់ខ្មាំងនៅក្នុងតំបន់ហ្គាហ្សាស្ទ្រីបរវាងអ៊ីស្រាអែល និងក្រុមប្រដាប់អាវុធប៉ាឡេស្ទីនហាម៉ាសបានចាប់ផ្ដើមកាលពីម៉ោង ៧ ព្រឹកថ្ងៃសុក្រ ក្រោយមានការសម្របសម្រួលពីសំណាក់ប្រទេសកាតា និងអេហ្ស៊ីប ហើយអាចនឹងបន្តសកម្មភាពនេះទៀត ប្រសិនបើអ្នកចាប់ពង្រត់ត្រូវបានដោះលែងជាហូរហែតាមកិច្ចព្រមព្រៀង ។

ប៉ុន្តែយ៉ាងណា ទោះមានកិច្ចព្រមព្រៀងនេះក៏ដោយ អ៊ីស្រាអែលនៅតែបន្តធ្វើការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃលើតំបន់ហ្គាហ្សាស្ទ្រីប រួមទាំងមន្ទីរពេទ្យ កន្លែងស្នាក់នៅ និងវិហារឥស្លាមផងដែរ ចាប់តាំងពីក្រុមហាម៉ាសប៉ាឡេស្ទីនបើកការរវាយប្រហារឆ្លងព្រំដែនកាលពីថ្ងៃទី៧ ខែតុលា និងបានចាប់ចំណាប់ខ្មាំងប្រហែល ២៤០ នាក់ ។

ចំណែកខាងក្រសួងសុខាភិបាលនៅតំបន់ហ្គាហ្សាវិញបានឲ្យដឹងថា ចាប់តាំងពីប្រតិបត្តិការវាយបករបស់អ៊ីស្រាអែលនៅពេលនោះមក ជនស៊ីវិលជាង ១៤,៨០០ នាក់ រួមទាំងកុមារ និងស្ត្រីសរុប ១០,១៥០ នាក់ត្រូវបានសម្លាប់ ខណៈខាងអ៊ីស្រាអែលវិញមានមនុស្សជិត ១,២០០ នាក់បានបាត់បង់ជីវិត ។

ក្រៅ​ពី​ចំនួន​អ្នក​ស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការវាយប្រហារសងសឹករបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សជាង ៣៦,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ Times of Israel