សមាជិក EU មួយប្រទេស ប្រាប់អ៊ុយក្រែន ឲ្យព្រមកាត់ដីជូនរុស្ស៊ី ដើម្បីចប់សង្គ្រាម

មុនដំណើរទស្សនកិច្ចទៅកាន់ប្រទេសអ៊ុយក្រែន លោក Robert Fico នាយករដ្ឋមន្ត្រីស្លូវ៉ាគី ដែលជាសមាជិកសហភាពអឺរ៉ុប (EU) បាននិយាយក្នុងសម្ភាសជាមួយទូរទស្សន៍ RTVS កាលពីចុងសប្តាហ៍ថា ទីក្រុងកៀវ ត្រូវតែទទួលស្គាល់ការកាត់ដីមួយចំនួន ដែលពីមុនស្ថិតនៅក្រោមការគ្រប់គ្រងរបស់ខ្លួន ដើម្បីបញ្ចប់ជម្លោះជាមួយរុស្ស៊ី។ នេះបើតាមការចុះផ្សាយរបស់សារព័ត៌មាន POLITICO។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍ នាយករដ្ឋមន្រ្តីស្លូវ៉ាគី គ្រោងធ្វើដំណើរនៅថ្ងៃពុធ ទៅកាន់ទីក្រុងព្រំដែន Uzhgorod ដើម្បីជួបជាមួយសមភាគីអ៊ុយក្រែនលោក Denis Shmygal។

លោក​ Fico ​និយាយ​ថា មើលទៅ ជម្លោះ​ររវាង​ក្រុងមូស្គូនិងកៀវ មិន​អាច​​ដោះស្រាយ​តាម​រយៈ​មធ្យោបាយ​យោធា​បានទេ ហើយ​គួរ​តែ​បញ្ចប់​ដោយ​ការ​សម្រុះសម្រួល​ ប៉ុន្តែវាអាចឲ្យភាគីទាំងសងខាងឈឺចាប់ដែរ។

លោកចោទសួរថា “តើអ៊ុយក្រែនកំពុងចាំអ្វី? ចាំរុស្ស៊ីចាកចេញពី Donbass និង Lugansk ឬចាំពួកគេចាកចេញពី Crimea មែនទេ? រឿងទាំងនេះពិតជាមិនអាចកើតឡើងបានឡើយ”។

សាធារណរដ្ឋប្រជាមានិត Donetsk និង Lugansk ត្រូវបានដាក់បញ្ចូលជាផ្លូវការទៅក្នុងរដ្ឋរុស្ស៊ីនៅរដូវស្លឹកឈើជ្រុះឆ្នាំ២០២២ រួមគ្នាជាមួយតំបន់ Kherson និង Zaporozhye ក្រោយការធ្វើប្រជាមតិ ដែលរៀបចំឡើងនៅក្នុងតំបន់ទាំងនោះរីឯឧបទ្វីប Crimea បានក្លាយជាផ្នែកមួយនៃប្រទេសរុស្ស៊ី តាំងតែពីឆ្នាំ២០១៤មកម្ល៉េះ។

នាយក​រដ្ឋមន្ត្រី​ស្លូវ៉ាគីបន្ថែមថា ការបន្តប្រយុទ្ធក្នុងជម្លោះដែលផ្ទុះឡើងតាំងតែពីខែកុម្ភៈឆ្នាំ២០២២មក នឹងធ្វើឲ្យទីក្រុងមូស្គូកាន់តែរឹងមាំ។ អ៊ុយក្រែន​មិន​មែន​ជា​ប្រទេស​ឯករាជ្យ​អធិបតេយ្យទេ ព្រោះខ្លួនស្ថិត​ក្រោម​ឥទ្ធិពល​​របស់​អាមេរិកទាំងស្រុង។ លើសពីនេះ លោកក៏បានរិះគន់ EU ផងដែរ ដែលបានសាងកំហុសដ៏ធំ ដោយឲ្យអាមេរិកដឹកមុខ ពាក់ព័ន្ធដំណោះស្រាយជម្លោះរុស្ស៊ី-អ៊ុយក្រែន។

ទោះបីជាយ៉ាងណាក៏ដោយ ការអះអាងខាងលើ បានបង្កឲ្យមានប្រតិកម្មយ៉ាងខឹងសម្បាពីសំណាក់ទីក្រុងកៀវ ដោយប្រធានគណៈកម្មាធិការកិច្ចការបរទេសនៃសភាអ៊ុយក្រែនលោក Aleksandr Merezhko បានទាមទារឲ្យលុបចោល ដំណើរទស្សនកិច្ចរបស់លោក Fico ទៅកាន់ អ៊ុយក្រែន ព្រោះតែសេចក្តីថ្លែងការណ៍ដ៏អាម៉ាស់ ឆ្លងកាត់បន្ទាត់ក្រហម។

សូមជម្រាបថា លោក Fico បានវិលមកកាន់តំណែងជានាយករដ្ឋមន្ត្រីស្លូវ៉ាគី សាជាថ្មីក្នុងខែតុលាឆ្នាំ២០២៣ បន្ទាប់ពីគណបក្សរបស់គាត់ ឈ្នះការបោះឆ្នោត ជាមួយគោលនយោបាយកាត់ជំនួយផ្នែកយោធាដល់ទីក្រុងកៀវ និងស្តារទំនាក់ទំនងជាមួយទីក្រុងមូស្គូ៕

អត្ថបទ៖ សុខ សុវណ្ណ

ចុចអាន៖ រដ្ឋមន្ត្រីការបរទេស រុស្ស៊ី ជិះយន្តហោះជិត ១៣ ម៉ោងទៅ អាមេរិក ប្រជុំរឿង ភ្លើងសង្គ្រាមនៅអ៊ុយក្រែន