សមាជិកសភាបក្សចលនាឆ្ពោះទៅមុខមួយរូប មានវង្សត្រកូលពីគ្រួសារសេដ្ឋីថៃ

ចាប់តាំងពីលេចមុខជាសាធារណៈក្នុងនាមជាសមាជិកសភា មកពីគណបក្សចលនាឆ្ពោះទៅមុខ​ ឬ Move Forward លោក Suphanat Minchaiynunt​ ឬហៅកាត់ថា Bank ​ត្រូវបានមហាជន​ដាក់​ឈ្មោះ​ថា ​ជា​អ្នក​នយោបាយ​សង្ហាបំផុតមិនធ្លាប់មានក្នុងប្រវត្តិសាស្រ្តរបស់ថៃ។

ជាពិសេសប្រជាជនក្នុងប្រទេសថៃជាច្រើនលាននាក់​ គ្មាន​នរណា​មិន​ស្គាល់​សមាជិក​សភា​វ័យក្មេងរូ​បនេះ ខណៈដែលលោកបានក្លាយ​ជាតំណាងរាស្រ្ដបាងកក មណ្ឌលទី៩ នៃតំបន់ Bang Khen, Chatuchak និង Lak Si ដែលត្រូវបានស្គាល់មុខមាត់ពិតថា លោកជាអ្នកនយោបាយសង្ហាតាំងពីដើមដំបូងនៃយុទ្ធនាការ រហូត​ដល់​​ចូល​មក​បំពេញ​តួនាទី​ជាសមាជិក​សភា​ពេញ​លេញដល់សព្វថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីបើបុរសវ័យក្មេងរូបនេះ ល្បីល្បាញនៅអាជីពនយោបាយយ៉ាងណាក្ដី ប៉ុន្តែមុនពេលប្រឡូកយ៉ាងពេញទំហឹងក្នុងនាមជាសមាជិកបក្ស លោក Suphanat មានគ្រួសារជាសេដ្ធីជំនួញប្រចាំប្រទេសថៃ និងជាអ្នកស្នងមរតករបស់សាជីវកម្មសំណង់ស៊ីវិលដ៏ធំដែលគ្រប់គ្រងដោយ Prayoonchai ចាប់តាំងពីឆ្នាំ១៩៨៤ មកម៉្លេះ។

គ្រួសារមហាសេដ្ឋី Minchainan ដើមឡើយត្រូវបានគេស្គាល់យ៉ាងច្បាស់នៅក្នុងឧស្សាហកម្មអចលនទ្រព្យ ដែលល្បីខ្លាំងនៅភាគខាងកើតទីក្រុងបាងកក ហើយ Bank គឺជាសមាជិកម្នាក់នៃគ្រួសារអ្នកមាននេះ។ លោក​ជា​កូន​ប្រុស​របស់​លោក Wisut Minchainan និង​លោកស្រី Sopit Minchainan ​ក៏​ត្រូវ​ជា​ចៅ​ប្រុស​របស់​លោក Wichan Meanchainan អតីត​អនុរដ្ឋមន្ត្រី​ក្រសួង​សាធារណការ​ចំនួន​ពីរ​អាណត្តិ​ជា​មេ​ដឹកនាំ​គណបក្ស​ភឿថៃ និងលោក Wirat Minchainan ប្រធានក្រុមប្រឹក្សាក្រុងបាងកក ស្រុក Minburi មកពីគណបក្សភឿថៃដូចគ្នា។ លោក​ក៏​ជា​សាច់​ញាតិ​ផ្ទាល់​របស់​លោក​បណ្ឌិត Suthee Minchainan ដែល​ជា​មេ​ដឹក​នាំ​ថៃ-ចិន ប្រធានកិត្តិយសអចិន្ត្រៃយ៍នៃសភាពាណិជ្ជកម្មថៃ-ចិនផងដែរ។

លើសពីនេះទៀតសោត បុរសមកពីត្រកូលអភិជន Suphanat Minchaiynunt ទទួលបានភាព​ល្បី​ល្បាញខ្លាំងក្នុងអំឡុងពេលដែលលោកកំពុងសិក្សាថ្នាក់បរិញ្ញាបត្រ ការគ្រប់គ្រងគម្រោងសម្រាប់ការសាងសង់ មានមូលដ្ឋាននៅ University College London និងកំពុងសិក្សាថ្នាក់អនុបណ្ឌិតនៅសាកលវិទ្យាល័យ Cambridge ។

ទោះយ៉ាងណាក៏ដោយ ក្នុងពេលដែលលោកធ្លាប់ប្រឡូកក្នុងអាជីវកម្មសំណង់ អចលនទ្រព្យ ការដឹកជញ្ជូន និងសូម្បីតែថ្នាំពេទ្យ ឥឡូវនេះលោកគឺជាអ្នកនយោបាយថៃដ៏ជោគជ័យម្នាក់ ដោយបានឈ្នះភ្លូកទឹកភ្លូកដីនៅក្នុងការបោះឆ្នោតឆ្នាំ២០២៣ និងជាប្រធានអនុគណៈកម្មាធិការពង្រឹងសហគ្រាសធុនតូច និងមធ្យម (SMEs) ផងដែរ។

សូមរម្លឹកដែរថា នៅក្នុងសន្និសីទសារព័ត៌មានមួយកាលពីថ្ងៃទីទី0៦ ខែមីនា ឆ្នាំ២០២៣ អនុប្រធានគណបក្សចលនាឆ្ពោះទៅមុខ លោក Picharn Chowapattanawong និងនាយករៀបចំការបោះឆ្នោតរបស់ MFP ប្រចាំទីក្រុងបាងកក លោក Theerajchai Panthumas បានប្រកាសថា Suphanat Minchaiynunt ជាបេក្ខជនចុងក្រោយរបស់គណបក្ស នៅទីក្រុងបាងកក។ កាលណោះ ការប្រកាសរបស់របស់សមាជិកបក្សបានធ្វើឲ្យមហាជនជាច្រើនមានការចាប់អារម្មណ៍នឹងរូបសម្បត្តិរបស់អ្នកនយោបាយវ័យក្មេងរូបនេះយ៉ាងខ្លាំង៕

អត្ថបទ៖ សាង ស្រីល័ក្ខ

ចុចអាន៖ម្ចាស់ជំនួញធំនៅថៃ ២ រូប លេចមុខក្នុងព្រះរាជពិធីអភិសេក បុត្រាស្ដេចព្រុយណេយ៉ាងស្និទ្ធស្នាលបំផុត