ព័ត៌មានអន្ដរជាតិ

ពលរដ្ឋ អូស្ត្រាលី ជាង ៥ សែននាក់ នឹងគ្មានអគ្គិសនីប្រើប្រាស់ជិត ១ សប្ដាហ៍ ក្រោយព្យុះភ្លៀងយាយីនៅរដ្ឋ Victoria

បានផុស

២ years មុន

នៅ

ថ្ងៃពុធ ១៤ កុម្ភៈ ២០២៤

ដោយ

ប្រជាពលរដ្ឋប្រមាណជិតកន្លះលានគ្រួសារនៅក្នុងរដ្ឋ Victoria ប្រទេសអូស្ត្រាលី កំពុងគ្មានអគ្គិសនីប្រើប្រាស់ ក្រោយមានព្យុះភ្លៀងមកវាយប្រហារបណ្តាញផលិត និងផ្គត់ផ្គង់អគ្គិសនី ។ នេះបើតាមការចុះផ្សាយរបស់សារព័ត៌មាន BBC នៅថ្ងៃទី១៤ ខែកុម្ភៈនេះ ។

បើតាមរដ្ឋមន្ត្រីក្រសួងថាមពលនៃរដ្ឋ Victoria លោកស្រី Lily D’Ambrosio បានប្រាប់សារព័ត៌មានបន្ថែមថា “ប្រជាពលរដ្ឋដល់ ៥២៩,០០០ នាក់ គ្មានភ្លើងអគ្គិសនីប្រើប្រាស់ បន្ទាប់ពីបណ្តាញផ្គត់ផ្គង់អគ្គិសនីរងការបំផ្លិចបំផ្លាញដោយសារអាកាសធាតុដ៏អាក្រក់” ។

ស្របពេលជាមួយគ្នានេះ ករណីវាយប្រហារដោយព្យុះភ្លៀងខាងលើ គឺនឹងអាចអូសបន្លាយពេលដល់ការផ្គត់ផ្គង់អគ្គិសនីទៅឲ្យប្រជាជនដល់ទៅរយៈពេល ១ សប្តាហ៍ ដែលនេះជាករណីធំជាងគេជាប្រវត្តិសាស្រ្តនៃគ្រោះធម្មជាតិដោយព្យុះភ្លៀងក្នុងរដ្ឋ Victoria ។

គួររំឭកថា ព្យុះភ្លៀងខាងលើនេះបណ្ដាលឲ្យកសិករម្នាក់បានបាត់បង់ជីវិត ដោយសារបំណែកបង្កដោយព្យុះភ្លៀងបុកលើកសិករ នៅពេលកំពុងបើកបរត្រាក់ទ័រ ។ នៅក្នុងវីដេអូនានាលើបណ្តាញសង្គមនៅអូស្រ្តាលីបានបង្ហាញនូវការខូចខាតទ្រព្យសម្បត្តិសារធារណជាច្រើន ហើយទន្ទឹមនឹងព្យុះភ្លៀងនោះ ករណីភ្លើងឆេះព្រៃនៅភាគខាងលិចនៃរដ្ឋដដែលនេះ ក៏កំពុងធ្វើទុកបុកម្នេញដល់ធនធាននៃរដ្ឋភាគខាងត្បូងអូស្រ្តាលីក្នុងលក្ខណៈទ្រង់ទ្រាយធំផងដែរ ៕

ដោយ៖ មាន រតនា