អូស្ត្រាលី គ្រោងផ្ដល់ទិដ្ឋាការរយៈពេល ១០ ឆ្នាំសម្រាប់ភ្ញៀវទេសចរមកពី​បណ្ដាប្រទេស អាស៊ាន

ថ្លែងក្នុងឱកាសបិទបញ្ចប់កិច្ចប្រជុំកំពូលពិសេស អាស៊ាន-អូស្ត្រាលី កាលពីថ្ងៃពុធ ទី៦ ខែមីនាកន្លងទៅ លោកនាយករដ្ឋមន្ត្រី Anthony Albanese បានប្រកាសថា អូស្ត្រាលីគ្រោងនឹងពិចារណាពង្រីកគម្រោងទិដ្ឋាការរយៈពេល ១០ ឆ្នាំដល់អ្នកទេសចរមកពីបណ្ដាប្រទេសអាស៊ាន និងទីម័រខាងកើតដែលតែងតែធ្វើដំណើរញឹកញាប់ចូលមកប្រទេសអូស្ត្រាលី ។

យោងតាមការចេញផ្សាយដោយសារព័ត៌មានវៀតណាម VN Express បានឲ្យដឹងថា គម្រោងពង្រីកទិដ្ឋាការរយៈពេល ១០ ឆ្នាំសម្រាប់អ្នកធ្វើដំណើរញឹកញាប់ពីបណ្ដាប្រទេសអាស៊ានចូលមកកាន់ទឹកដីអូស្ត្រាលី នឹងអនុញ្ញាតឲ្យភ្ញៀវទេសចរទាំងនោះស្នាក់នៅរហូតដល់ ៣ ខែ ពោលជារៀងរាល់ពេលដែលអ្នកដំណើរហោះចូលប្រទេសមួយនេះ ។

ទន្ទឹមនោះ អូស្ត្រាលីក៏គ្រោងនឹងដាក់ចេញគោលការណ៍ពង្រីកសុពលភាពទិដ្ឋាការអាជីវកម្មពី ៣ ទៅ ៥ ឆ្នាំផងដែរ ខណៈកាលពីពេលកន្លងមក អូស្ត្រាលីបានបើកភ្លើងខៀវឲ្យទេសចរចិនដាក់ពាក្យស្នើសុំគម្រោងទិដ្ឋាការរយៈពេល ១០ ឆ្នាំរួចទៅហើយដែលជាផ្នែកមួយនៃកិច្ចខិតខំប្រឹងប្រែងដើម្បីទាក់ទាញទេសចរមកពីប្រទេសដែលមានចំនួនប្រជាជនច្រើនជាងគេលំដាប់ទី ២ របស់ពិភពលោកមួយនេះ ។

បើទោះជាយ៉ាងនេះក្តី អូស្ត្រាលីនៅតែចាញ់បង់ ដោយសារទេសចរចិនបាននិងកំពុងសម្រុកទៅកាន់បណ្ដាប្រទេសអាស៊ានដូចជា ថៃ និងម៉ាឡេស៊ីជាដើម ព្រោះតែគោលនយោបាយលើកលែងទិដ្ឋាការពីសំណាក់ប្រទេសទាំងនេះ ខណៈមុនពេលរោគរាតត្បាតកូវីដ ១៩ សិង្ហបុរី ម៉ាឡេស៊ី និងឥណ្ឌូណេស៊ី គឺជាទីផ្សារទេសចរណ៍បរទេសដ៏ធំបំផុត ដែលហោះចូលមកលេងកម្សាន្តប្រទេសអូស្ត្រាលី ។

យោងតាមនាយកដ្ឋានកិច្ចការបរទេស និងពាណិជ្ជកម្មរបស់ប្រទេសអូស្ត្រាលីបានឲ្យដឹងថា កាលពីឆ្នាំ ២០១៩ ការហោះមកដល់របស់ភ្ញៀវទេសចរអាស៊ានបានកើនឡើងដល់ ១.៥ លាននាក់ ទាញចំណូលចូលសេដ្ឋកិច្ចអូស្ត្រាលីបានប្រមាណ ៤.២ ពាន់លានដុល្លារអូស្ត្រាលី (ស្មើនឹង ២.៧ ពាន់លានដុល្លារអាមេរិក) ៕

ដោយ ៖ សុខ ជីវ័ន្ត