ហុងកុង ចាប់ខ្លួនមនុស្ស ៦ នាក់ជុំវិញការបង្ហោះលើ Facebook បំពានច្បាប់សន្តិសុខជាតិ

ប៉ូលិសនៅទីក្រុងហុងកុងបានចាប់ខ្លួនមនុស្សចំនួន ៦ នាក់ដោយសង្ស័យថាបំពានច្បាប់សន្តិសុខជាតិថ្មីតាមរយៈការបង្ហោះសារដ៏អសុរោះនៅលើបណ្ដាញសង្គម Facebook និងញុះញង់ឲ្យមានការស្អប់ខ្ពើមលើអាជ្ញាធរ ។​ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK កាលពីថ្ងៃទី២៨ ខែឧសភា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះគឺជាការចាប់ខ្លួនលើកដំបូងក្រោមច្បាប់ដែលបានចូលជាធរមាននៅក្នុងខែមីនា ហើយអ្នក​ទាំង ​៦ ​នាក់​ដែល​ត្រូវ​បាន​ចាប់​ខ្លួននោះ​ ​រួម​មាន​លោកស្រី Chow Hang Tung គឺជាអតីតអនុប្រធាននៃក្រុមដែលធ្លាប់រៀបចំការប្រឆាំងប្រចាំឆ្នាំដើម្បីចងចាំជនរងគ្រោះនៃការបង្ក្រាបនៅទីលានធានអានមិននៅថ្ងៃទី៤ ខែមិថុនា ឆ្នាំ១៩៨៩ ។

ប៉ូលិសបានឲ្យដឹងថា ជនសង្ស័យបានកំណត់កាលបរិច្ឆេទដ៏រសើបនាពេលខាងមុខសំដៅដល់ខួបនៃឧប្បត្តិហេតុនេះ ។ពួកគេក៏បានជជែកវែកញែកផងដែរថា ការបង្ហោះនេះមានគោលបំណងបង្កការស្អប់ខ្ពើមចំពោះរដ្ឋាភិបាហុងកុង និងញុះញង់អ្នកនិយមលេងអ៊ីនធឺណិតឲ្យរៀបចំ ឬចូលរួមក្នុងសកម្មភាពខុសច្បាប់ ។

លើសពីនេះអាជ្ញាធរក៏មានការប្រុងប្រយ័ត្នខ្ពស់មុនខួបលើកទី ៣៥ នៃឧបទ្ទវហេតុនេះ ខណៈរដ្ឋមន្ត្រីសន្តិសុខលោក Chris Tang បានជំរុញពលរដ្ឋកុំឲ្យមានការញុះញង់ ឬចូលរួមយល់ដឹងអំពើខុសច្បាប់ និងអំពើដែលបង្កគ្រោះថ្នាក់ដល់សន្តិសុខជាតិ ។

គួរបញ្ជាក់ថា កាលពីថ្ងៃទី៤ ខែមិថុនា ឆ្នាំ១៩៨៩ រដ្ឋាភិបាលនៃសាធារណៈរដ្ឋប្រជាមានិតចិន (PRC) បានបញ្ជូនរថក្រោះចូលទៅក្នុងទីលានធានអានមិន ដើម្បីគាបសង្កត់យ៉ាងឃោរឃៅចំពោះបាតុករគាំទ្រលទ្ធិប្រជាធិបតេយ្យចិន ខណៈភាពក្លាហានរបស់ជនរងគ្រោះនឹងមិនត្រូវបានគេបំភ្លេចឡើយ ហើយបន្តជំរុញទឹកចិត្តអ្នកតស៊ូមតិសម្រាប់គោលការណ៍ទាំងនេះជុំវិញពិភពលោក ៕

អត្ថបទ៖ ប៊ុន សុភាព