ព័ត៌មានអន្ដរជាតិ

កូរ៉េខាងជើង បាញ់មីស៊ីល២គ្រាប់ ក្រោយសមយុទ្ធត្រីភាគីអាមេរិក កូរ៉េខាងត្បូង និងជប៉ុន

បានផុស

២ years មុន

នៅ

ថ្ងៃចន្ទ ១ កក្កដា ២០២៤

ដោយ

Chheang

ជាការឆ្លើយតប និងជាការព្រមានចំពោះសមយុទ្ធត្រីភាគីរវាងសហរដ្ឋអាមេរិក កូរ៉េខាងត្បូង និងជប៉ុន ដែលទើបបញ្ចប់, ទីក្រុងព្យុងយ៉ាង បានបាញ់ផ្លោងមីស៊ីលបាលេស្ទិកចំនួន២គ្រាប់ នៅព្រឹកថ្ងៃចន្ទទី១ ខែកក្កដា ឆ្នាំ២០២៤ នេះ។

អគ្គសេនាធិការចម្រុះកូរ៉េខាងត្បូង បាននិយាយថា មីស៊ីលទាំង២គ្រាប់ ត្រូវកូរ៉េខាងជើងបាញ់ក្នុងរយៈពេលគម្លាតគ្នា ១០នាទី ក្នុងទិសដៅទៅភាគឦសាន ចេញពីទីក្រុង Jangyon ដែលស្ថិតនៅភាគអាគ្នេយ៍ប្រទេស។ គ្រាប់ទី១ ហោះបានរយៈចម្ងាយ ៦០០គីឡូម៉ែត្រ ផ្លោងចូលក្នុងសមុទ្រភាគខាងកើតនៃទីក្រុង Chogjin ខណៈដែលគ្រាប់ទី២វិញ ហោះបានរយៈចម្ងាយខ្លីប៉ុណ្ណោះត្រឹម ១២០គីឡូម៉ែត្រ។ កូរ៉េខាងត្បូង ថា គ្រាប់ទី២នេះ ទំនងជាមិនអាចផ្លោងចូលសមុទ្របាននោះទេ ហើយទីតាំងជាក់លាក់ដែលគ្រាប់ធ្លាក់ក៏មិនទាន់ដឹងនោះដែរ តែសង្ស័យអាចបង្កជាការរងគ្រោះ និងខូចខាតមួយចំនួនជាក់ជាមិនខាន។

ពាក់ព័ន្ធនឹងការបាញ់មីស៊ីលនេះ កូរ៉េខាងត្បូង បានបញ្ជាក់ថា ក្រុងសេអ៊ូលបានត្រៀមខ្លួនយ៉ាងម៉ឺងម៉ាត់រួចហើយជាមួយសហរដ្ឋអាមេរិក ចំពោះការបង្កហេតុណាមួយរបស់កូរ៉េខាងជើង។

សូមបញ្ជាក់ថា មីស៊ីល២គ្រាប់ដែលក្រុងព្យុងយ៉ាងបានបាញ់ ធ្វើឡើង២ថ្ងៃបន្ទាប់ពីការបញ្ចប់សមយុទ្ធទ្រង់ទ្រាយធំ ដែលហៅថា “Freedom Edge” របស់សម្ព័ន្ធមិត្តចំនួន៣ មានដូចជា សហរដ្ឋអាមេរិក កូរ៉េខាងត្បូង និងជប៉ុន។ នាប៉ុន្មានឆ្នាំចុងក្រោយនេះ ប្រទេសទាំង៣ បានពង្រីកភាពជាដៃគូសន្ដិសុខត្រីភាគី ដើម្បីបង្ការការគំរាមកំហែងការអភិវឌ្ឍនុយក្លេអ៊ែររបស់កូរ៉េខាងជើង និងការទាមទារអធិបតេយ្យភាពលើដែនសមុទ្រចិនខាងត្បូងរបស់ក្រុងប៉េកាំង៕

ដោយ៖ ឈាង