ព័ត៌មានអន្ដរជាតិ

អាមេរិក ច្រានចោលលទ្ធផលបោះឆ្នោតនៅវ៉េណេស៊ុយអេឡា និងប្រកាសទទួលស្គាល់បក្សប្រឆាំងជាអ្នកឈ្នះ

បានផុស

២ years មុន

នៅ

ថ្ងៃសុក្រ ២ សីហា ២០២៤

ដោយ

Chheang

រដ្ឋាភិបាលសហរដ្ឋអាមេរិក កាលពីថ្ងៃព្រហស្បតិ៍បានប្រកាសទទួលស្គាល់ថា គណបក្សប្រឆាំងនៅក្នុងប្រទេសវ៉េណេស៊ុយអេឡាដែលមានលោក Edmundo Gonzalez ជាបេក្ខភាព គឺជាអ្នកយកឈ្នះលើការបោះឆ្នោតថ្នាក់ជាតិ ដែលផ្ទុយពីអ្វីដែលបក្សកាន់អំណាចរបស់លោកប្រធានាធិបតី នីកូឡាស ម៉ាឌូរ៉ូ បានប្រកាសក្ដែងៗថាខ្លួនមានសម្លេងគាំទ្រច្រើនជាងគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Antony Blinken រដ្ឋមន្ត្រីការបរទេសអាមេរិក បានរៀបរាប់នៅក្នុងសេចក្ដីថ្លែងការណ៍ថា៖ «ដោយផ្អែកលើព័ស្តុតាងដ៏លើសលប់ វាច្បាស់ណាស់ចំពោះសហរដ្ឋអាមេរិក ហើយសំខាន់បំផុតចំពោះប្រជាជនវ៉េណេស៊ុយអេឡា ដែលថា លោក Edmundo González Urrutia បានឈ្នះការបោះឆ្នោតច្រើនជាងគេក្នុងការបោះឆ្នោតប្រធានាធិបតីថ្ងៃទី២៨ខែកក្កដារបស់ប្រទេសវ៉េណេស៊ុយអេឡា»។

ក្រុមប្រឹក្សារៀបចំការបោះឆ្នោតជាតិវ៉េណេស៊ុយអេឡា បានប្រកាសកាលពីថ្ងៃចន្ទថា លោក ម៉ាឌូរ៉ូ បានយកឈ្នះគូប្រជែងក្នុងសម្លេង ៥១,២% ទល់នឹង ៤០,២% ប៉ុន្តែការរាប់សន្លឹកឆ្នោតលម្អិតបែរជាមិនបង្ហាញឲ្យគ្រប់គ្នាបានដឹងបានឮទៅវិញ។ ប្រការនេះហើយបានធ្វើបណ្ដាអន្តរជាតិរួមមានទាំងសហរដ្ឋអាមេរិក និងសម្ព័ន្ធមិត្តជិតស្និទ្ធរបស់វ៉េណេស៊ុយអេឡាដូចជាប្រទេសប្រេស៊ីល កូឡុំប៊ី និងម៉ិកស៊ិក ទាមទារឲ្យមានការបង្ហាញទិន្នន័យពិតប្រាកដនៃសន្លឹកឆ្នោត ខណៈគណបក្សប្រឆាំងបានអះអាងថាមានព័ស្ដុតាងជាឯកសារព្រីននៃទិន្នន័យឆ្នោត ដែលបញ្ជាក់ថាពួកគេទទួលសម្លេងគាំទ្រច្រើនជាង២ភាគ៣ឯណោះ ពោលគឺយកឈ្នះដាច់លើលោក ម៉ាឌូរ៉ូ តែម្ដង។

លោក ម៉ាឌូរ៉ូ ដែលជាប្រធានាធិបតីបច្ចុប្បន្ននៅវ៉េណេស៊ុយអេឡា បានឆ្លើយតបទៅនឹងសហរដ្ឋអាមេរិកភ្លាមៗវិញថា កុំឲ្យប្រទេសមហាអំណាចមួយនេះចេះដឹងរឿងកិច្ចការផ្ទៃក្នុងរបស់វ៉េណេស៊ុយអេឡា។

កាលពីប៉ុន្មានថ្ងៃមុន លោក ម៉ាឌូរ៉ូ បានកោះហៅទូតខ្លួន និងបណ្តេញទូតនៃប្រទេសស្ទើរទាំងអស់នៅអាមេរិកឡាទីន ដោយសារតែការមិនទទួលស្គាល់លទ្ធផលបោះឆ្នោតប្រធានាធិបតីដ៏ចម្រូងចម្រាស និង ចោទប្រទេសទាំងនោះថា ជ្រៀតជ្រែកកិច្ចការប្រទេសខ្លួន។ បណ្ដាអន្តរជាតិ បានជំរុញឲ្យវ៉េណេស៊ុយអេឡាបង្ហាញពីទិន្នន័យរាប់សន្លឹកឆ្នោតជាសាធារណៈ ហើយប្រាប់ថា នេះគឺជាវិធីតែមួយគត់អាចលុបចោលនូវការសង្ស័យពីមជ្ឈដ្ឋានខាងក្រៅបាន។

សូមបញ្ជាក់ថា កាលពីដើមសប្ដាហ៍ ក្រោយប្រកាសលទ្ធផលបោះឆ្នោត បាតុកម្មបានផ្ទុះឡើងជាច្រើនកន្លែងនៅក្នុងប្រទេសវ៉េណេស៊ុយអេឡា ដោយបង្ហាញពីការមិនពេញចិត្តឲ្យលោក ម៉ាឌូរ៉ូ បន្តកាន់អំណាចនៅក្នុងអាណត្តិទី៣របស់លោករយៈពេល៦ឆ្នាំថែមទៀតនោះទេ។ នៅក្នុងបាតុកម្មនេះ មានមនុស្សស្លាប់យ៉ាងហោចណាស់ ១១នាក់ និងមានអ្នករងរបួសមួយចំនួន៕

ដោយ៖ ឈាង