ថៃ បោះពុម្ភខិតប័ណ្ណសរសេរជា ៦ភាសារួមទាំងខ្មែរផងដែរ សុំឲ្យឈប់ផ្តល់លុយ ទៅអ្នកសុំទាន

ពេលនេះប្រទេសថៃ បានប្រកាសពីយុទ្ធនាការជំរុញឲ្យសាធារណជន ឈប់ផ្តល់ប្រាក់ទៅអ្នកសុំទាន ដោយក្រសួងអភិវឌ្ឍន៍សង្គមនិងសន្តិសុខមនុស្ស បានចាប់ផ្តើមបោះពុម្ភខិតប័ណ្ណដែលមានសរសេរជា៦ភាសា ដូចជា ថៃ អង់គ្លេស ចិន ជប៉ុន កូរ៉េ និងខ្មែរ ដើម្បីសុំកុំឲ្យធ្វើដូច្នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Bangkok Post នៅថ្ងៃពុធទី១៤ខែសីហាឆ្នាំ២០២៤, យុទ្ធនាការនឹងចាប់ផ្តើមនៅថ្ងៃសុក្រ ហើយការដែលថៃធ្វើបែបនេះ គឺបន្ទាប់ពីលទ្ធផលស្ទង់មតិទូទាំងប្រទេសបង្ហាញថា ចំនួនអ្នកសុំទាន កំពុងកើនឡើងគួរឲ្យកត់សម្គាល់។

វិស័យពាក់ព័ន្ធរួមមាន រដ្ឋបាលក្រុងបាងកក, ស្នងការប៉ូលិសក្រុង, ការិយាល័យអន្តោប្រវេសន៍, អង្គការ Mirror Foundation និងក្រុមដែលធ្វើការដើម្បីដោះស្រាយបញ្ហាអ្នកសុំទាន ត្រូវបានគេរំពឹងថានឹងចូលរួមក្នុងព្រឹត្តិការណ៍នេះ។

យុទ្ធនាការនេះ គឺដើម្បីលើកកម្ពស់ការយល់ដឹងអំពីបញ្ហាអ្នកសុំទានដែលកំពុងកើនឡើង និងចាត់វិធានការផ្លូវច្បាប់ ដើម្បីគ្រប់គ្រងចំនួនអ្នកសុំទាន ហើយក៏មានគោលបំណងឲ្យអ្នកទាំងឡាយប្តូរផ្នត់គំនិត ឈប់ឲ្យលុយទៅអ្នកសុំទានផងដែរ ព្រោះថាការធ្វើបែបនេះនឹងនាំឲ្យមនុស្សកាន់តែច្រើន ជ្រើសរើសការសុំទានធ្វើជាមុខរបរតែម្តង ណាមួយវាក៏ប៉ះពាល់ខ្លាំងដល់វិស័យទេសចរណ៍ផងដែរ។

តាមការបញ្ជាក់ពីលោក Varawut Silpa-archa រដ្ឋមន្ត្រីក្រសួងអភិវឌ្ឍន៍សង្គមនិងសន្តិសុខមនុស្ស, យុទ្ធនាការរបស់ក្រសួងបានរកឃើញអ្នកសុំទានចំនួន៥០៦នាក់ នៅតាមដងផ្លូវទូទាំងប្រទេសក្នុងឆ្នាំសារពើពន្ធដែលបញ្ចប់នៅខែក្រោយ ពោលគឺកើនឡើង ២០% បើធៀបនឹងឆ្នាំមុន។ ក្នុង​នោះ​មាន ៣៣១​នាក់ ឬ ៦៥% ជា​ជនជាតិ​ថៃ។

អ្នកសុំទានភាគច្រើនត្រូវបានរកឃើញនៅក្នុងទីក្រុងបាងកក និងខេត្តទេសចរណ៍សំខាន់ៗដូចជា Chon Buri, Chiang Mai, Phuket, និង Lop Buri ខណៈខេត្ត​ចំនួន៩ដែល​គ្មាន​អ្នក​សុំទាន​គឺ Chai Nat, Sing Buri, Satun, Nakhon Phanom, Lampang, Phetchaburi, Nan និង Phanngga៕

អត្ថបទ៖ សុខ សុវណ្ណ

ចុចអាន៖ ថៃ ចាត់វិធានការក្តៅ លើជនបរទេសដែលសុំទាន លើដីខ្លួន