កូនប្រុសប្រធានាធិបតីអាមេរិក សារភាពទោសកំហុសពីបទគេចពន្ធ

តាមសេចក្តីរាយការណ៍របស់ BBC នៅថ្ងៃសុក្រទី៦ខែកញ្ញាឆ្នាំ២០២៤, ពេលនេះ លោក ហាន់ធើ បៃដិន ដែលជាកូនប្រុសរបស់ប្រធានាធិបតីអាមេរិក ចូ បៃដិន សុខចិត្តសារភាពទោសកំហុសហើយ ចំពោះការចោទប្រកាន់ពីបទគេចពន្ធ។

នៅខែធ្នូឆ្នាំមុន លោក ហាន់ធើ ត្រូវចោទប្រកាន់ពីបទគេចពន្ធចំនួន៩ករណី ពេលដែលគាត់កំពុងប្រើប្រាស់គ្រឿងញៀន និងមានជីវិតដ៏ហ៊ឺហាចាយខ្ជះខ្ជាយ ប៉ុន្តែកាលនោះលោកមិនទទួលស្គាល់កំហុសឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចោទប្រកាន់លើលោក ហាន់ធើ រួមមានបទព្រហ្មទណ្ឌចំនួន៣ករណីនិងបទមជ្ឈិម៦ករណីដូចជាការគេចពន្ធ ការមិនបង់ប្រាក់ ខកខានមិនដាក់ឯកសារ និងផ្តល់ចម្លើយក្លែងក្លាយជាដើម។

យោងតាមរដ្ឋអាជ្ញា លោកហាន់ធើ មានជាប់ពាក់ព័ន្ធក្នុងគម្រោងគេចវេះពីការបង់ពន្ធលើប្រាក់ចំណូល១.៤លានដុល្លារចន្លោះឆ្នាំ២០១៦ដល់២០១៩។

ក្នុង​អំឡុង​ពេល​នោះ លោក ហាន់ធើ បាន​បម្រើការ​នៅ​ក្រុមប្រឹក្សាភិបាល​នៃ​ក្រុមហ៊ុន​ថាមពល​អ៊ុយក្រែន Burisma និង​ក្រុមហ៊ុន​ចិន CEFC China Energy Co Ltd ហើយប្រសិនបើត្រូវបានកាត់ទោសមែន ​គាត់​ប្រឈម​នឹង​ការ​ជាប់​ពន្ធនាគារ​អតិបរមា ១៧ ឆ្នាំ។

ទន្ទឹមនឹងនេះដែរ លោក ហាន់ធើ ត្រូវបានកាត់ទោសពីបទចោទប្រកាន់ពាក់ព័ន្ធការកាន់កាប់កាំភ្លើងនៅរដ្ឋ Delaware ហើយអាចជាប់ពន្ធនាគាររហូតដល់ទៅ២៥ឆ្នាំ ក្នុងករណីនៅឯសវនាការដែលគ្រោងធ្វើនៅខែវិច្ឆិកា បន្ទាប់ពីការបោះឆ្នោតប្រធានាធិបតី៕

អត្ថបទ៖ សុខ សុវណ្ណ

ចុចអាន៖ លោកបៃដិន ប្តេជ្ញាមិនលើកលែងទោសឲ្យ កូនប្រុស