៤ចំណុចចាប់អារម្មណ៍ខ្លាំង ក្នុងការដេញដោលគ្នាតឹងសរសៃ.ក រវាងលោក ត្រាំ និងលោកស្រី ហារីស

នៅថ្ងៃពុធទី១១ខែកញ្ញឆ្នាំ២០២៤បេក្ខជនប្រធានាធិបតីអាមេរិកមកពីគណបក្សទាំងសងខាង បានជួបជជែកដេញដោលតទល់គ្នាជាលើកដំបូង មុនការបោះឆ្នោតដែលនឹងឈានចូលមកដល់នៅប៉ុន្មានខែខាងមុខ។

លោក ដូណាល់ ត្រាំ នៃគណបក្សសាធារណរដ្ឋនិង លោកស្រី កាម៉ាឡា ហារីស មកពីគណបក្សប្រជាធិបតេយ្យ បានជជែកគ្នាតឹងសរសៃ.ក រយៈពេល៩០នាទី ក្នុងកម្មវិធីដែលរៀបចំដោយ​ ABC News នៅទីក្រុង Philadelphia នៃរដ្ឋPennsylvania។

ខាងក្រោមនេះ គឺជាចំណុចគួរឲ្យចាប់អារម្មណ៍ចំនួន៤ ដែលកម្ពុជាថ្មី ដកស្រង់ចេញពីការជជែកដេញដោលនោះ៖

១. ត្រាំនិយាយវិលចុះវិលឡើងៗ អំពីបញ្ហាអន្តោរប្រវេសន៍

លោក ត្រាំ ហាក់ដូចជាវិលវល់បន្តិច ហើយនិយាយចុះឡើង ដែលមើលទៅដូចជាមិនច្បាស់ជាមួយសំណួររបស់អ្នកសម្របសម្រួល។ លោក ត្រាំ បាននិយាយអំពីបញ្ហាសេដ្ឋកិច្ច ហើយបន្ទាប់ទៀត គាត់និយាយអំពីបំពង់បង្ហូរប្រេង។ ក្រោយពីនោះ គាត់ក៏និយាយអំពីការថែទាំសុខភាព រួចក៏​លើក​ឡើង​ពីបញ្ហា​អន្តោប្រវេសន៍។ ចប់ពីនេះ គាត់ក៏និយាយអំពីអ្វីផ្សេងទៀត រួចក៏បកមកនិយាយអំពីបញ្ហាអន្តោប្រវេសន៍ម្តងទៀត។

មើលទៅក៏អាចចាត់ទុកថាលោក ត្រាំ ឆ្លាតដែរព្រោះបញ្ហាអន្តោប្រវេសន៍នេះហើយ ដែលគាត់មានសង្ឃឹមទទួលបានការសរសើរច្រើន ហើយអាចឈ្នះលើលោកស្រី ហារីស ព្រោះលោកស្រីហារីស មិនសូវមានកំណត់ត្រាល្អទេទាក់ទងនឹងរឿងនេះ។

ត្បិតគ្មានអ្វីសំអាង តែលោកត្រាំ បានចោទប្រកាន់ជនអន្តោប្រវេសន៍និងជនភៀសខ្លួនហៃទីនៅទីក្រុង Springfield រដ្ឋ Ohio ថាជាអ្នកហូបសត្វចិញ្ចឹមរបស់ប្រជាជន។ លោកនិយាយថា «នៅ Springfield ពួកគេហូបសត្វសុនក និងជាអ្នក​ដែល​ចូល​មកបរិភោគ​ឆ្មា»។

ទោះបីជាយ៉ាងណាក៏ដោយ នេះមិនមែនជារឿងថ្មីឡើយព្រោះគេស្គាល់ច្បាស់ថា លោកត្រាំ គឺជាមនុស្សនិយាយមិនសំចៃមាត់បែបនេះ។

២. ហារីស បន្ទោស​ ត្រាំ កប់ៗមាត់

ចប់ប្រធានបទនេះ លោកស្រី ហារីស បានបន្ទោសលោក ត្រាំ កប់ៗមាត់ ហើយថែមទាំងស្តីឲ្យគាត់ថាជាមនុស្សមិនចេះខ្មាសទៀតផង។

អនុប្រធានាធិបតីរូបនេះ បានហៅបេក្ខជនមកពីគណបក្សសាធារណរដ្ឋថា «លោកខ្សោយណាស់» ហើយលោកស្រីក៏ទាត់ចោលការចោទប្រកាន់របស់យុទ្ធនាការលោកត្រាំផងដែរ ដែលថា ពិភពលោកនឹងសើចចំអកឲ្យការដឹកនាំរបស់សហរដ្ឋអាមេរិក។

លោកស្រី ហារីស ប្រាប់ទៅលោក ត្រាំ ថា «គេដឹងច្បាស់ហើយថា មានមេដឹកនាំផ្តាច់ការនិងក្រុមផ្តាច់ការ កំពុងចាក់ឫសឲ្យអ្នកក្លាយជាប្រធានាធិបតីម្តងទៀត។ អ្នកកំពុងត្រូវគេបោក ​ហើយ​មេដឹកនាំ​យោធា​ជាច្រើន​ដែល​អ្នក​ធ្លាប់​ធ្វើ​ការ​ជាមួយ​អ្នក បាន​ប្រាប់​ខ្ញុំ​ថា ​អ្នក​ជា​មនុស្សមិនចេះខ្មាស»។

៣. បញ្ហានៅហ្គាហ្សា

នៅពេលសួរអំពីសង្រ្គាមនៅហ្គាហ្សា បេក្ខជនទាំងពីរបានបញ្ចេញមតិរៀងៗខ្លួន។

លោកស្រី ហារីស និយាយថា លោកស្រីគាំទ្រកិច្ចព្រមព្រៀងឈប់បាញ់នៅតំបន់ ហ្គាហ្សា ដែលនឹងនាំឲ្យមានការដោះលែងចំណាប់ខ្មាំងអ៊ីស្រាអែល ប៉ុន្តែលោកស្រីក៏ប្តេជ្ញាបន្តផ្តល់អាវុធដល់អ៊ីស្រាអែល និងគាំទ្រចំពោះដំណោះស្រាយរដ្ឋពីរផងដែរ។

តាមការលើកឡើងរបស់លោកស្រីហារីស, «អ៊ីស្រាអែលមានសិទ្ធិការពារខ្លួន តែយ៉ាងណា មានប្រជាជនប៉ាឡេស្ទីនស្លូតត្រង់ជាច្រើននាក់ត្រូវបានសម្លាប់ ដូចជាកូនៗ ម្តាយជាដើម។ អ្វី​ដែល​យើង​ដឹង​គឺ​សង្គ្រាម​នេះ​ត្រូវ​តែ​បញ្ចប់។ ខ្ញុំនឹងផ្តល់លទ្ធភាពឲ្យជានិច្ចដល់អ៊ីស្រាអែលដើម្បីការពារខ្លួន ជាពិសេសបើអ៊ីរ៉ង់និងចលនាប្រដាប់អាវុធរបស់ពួកគេ គំរាមកំហែងនិងរករឿងអ៊ីស្រាអែល»។

ចំណែក​លោកត្រាំវិញ ​បាន​បញ្ជាក់​ជំហរ​របស់​លោកដដែល​ថា សង្គ្រាម​នៅ​មជ្ឈិមបូព៌ា​នឹង​មិន​ផ្ទុះ​ឡើង​ឡើយ ប្រសិន​បើ​លោក​កាន់​តំណែងនោះ។ លោកថែមទាំងចោទ​លោកស្រីហារីស ថា​ ​ប្រឆាំង​នឹង​អ៊ីស្រាអែលទៅវិញ។ «ហារីស ស្អប់អ៊ីស្រាអែលណាស់។ នាងស្អប់ប្រជាជនអារ៉ាប់ ពីព្រោះកន្លែងទាំងមូលនឹងមានការបំផ្លិចបំផ្លាញ! អ៊ីស្រាអែល​នឹងរលាយ​បាត់​»។

៤. បេក្ខជនទាំង២ ​បញ្ចេញ​ទស្សនៈ​ខុសៗ​គ្នា​លើ​បញ្ហាអ៊ុយក្រែន

លោក ត្រាំ និយាយថា លោកនឹងជំរុញឲ្យមានកិច្ចព្រមព្រៀងមួយដើម្បីបញ្ចប់ជម្លោះ ខណៈលោកស្រី ហារីស បានសង្កត់ធ្ងន់លើតម្រូវការ ជួយដល់កងកម្លាំងអ៊ុយក្រែនដើម្បីវាយបកប្រឆាំងរុស្ស៊ីវិញ។

នៅពេលសួរថាតើសហរដ្ឋអាមេរិកគួរតែបន្តជួយអ៊ុយក្រែនឲ្យឈ្នះសង្រ្គាមដែរឬក៏អត់នោះ លោក ត្រាំ ឆ្លើយថា «ខ្ញុំគិត បើអាមេរិកជួយសង្រ្គាមនេះបញ្ចប់វាជាផលប្រយោជន៍ដ៏ល្អបំផុតសម្រាប់ខ្លួនឯង ហើយយើងត្រូវចរចាលើកិច្ចព្រមព្រៀងមួយ ពីព្រោះយើងត្រូវបញ្ឈប់កុំឲ្យមានការសម្លាប់មនុស្សតទៅទៀត។ លោកអះអាងថា កង្វះភាពជាអ្នកដឹកនាំនៅក្នុងរដ្ឋបាលរបស់លោក បៃដិន នោះហើយ បានបើកដៃឲ្យរុស្ស៊ីឈ្លានពានអ៊ុយក្រែន។

ងាកទៅហារីសវិញ លោកស្រីបានរិះគន់ថា លោក ត្រាំ ហាក់ស្ទាក់ស្ទើរមិនគាំទ្រពេញទំហឹងដល់អ៊ុយក្រែនសោះ។ បើលោក ត្រាំ កាន់តំណែងមែន ថ្ងៃនេះប្រហែលជាប្រធានាធិបតីរុស្ស៊ី វ្ល៉ាឌីមៀរ ពូទីន ស្ថិតនៅក្នុងទីក្រុង កៀវ បាត់ទៅហើយ។

អ្នកស្រីអះអាងថា «យល់ទេ! សម្ព័ន្ធមិត្តអឺរ៉ុបរបស់យើងក៏ដូចជាសម្ព័ន្ធមិត្តណាតូ ពិតជាត្រេកអរខ្លាំងណាស់ដែលអ្នកលែងជាប្រធានាធិបតី។ យើងយល់ពីសារៈសំខាន់នៃយោធាដ៏អស្ចារ្យបំផុតដែលពិភពលោកបានស្គាល់នោះគឺ NATO»៕

អត្ថបទ៖ សុខ សុវណ្ណ

ចុចអាន៖ តើ​​លក្ខខណ្ឌ​នៃ​ការ​ជជែក​ដេញដោល​រវាងត្រាំ និង ហារីស​ ត្រូវកំណត់យ៉ាងណា?​