វៀតណាម បើកទឹក ចេញពីទំនប់វារីអគ្គិសនីធំបំផុតនៅភាគខាងត្បូង

ប្រទេសវៀតណាម បានប្រកាសបើកទ្វារទំនប់វារីអគ្គិសនីធំបំផុតនៅភាគខាងត្បូងនាវេលាម៉ោង១០ព្រឹកថ្ងៃចន្ទទី២៣ខែកញ្ញាឆ្នាំ២០២៤ ដូច្នេះពលរដ្ឋរស់នៅតាមខ្សែទឹកខាងក្រោមត្រូវត្រៀមខ្លួននិងប្រុងប្រយ័ត្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ VN Express, ការសម្រេចចិត្តនេះធ្វើឡើង ស្របពេលទឹកទន្លេ Dong Nai កំពុងហក់ឡើងខ្ពស់ បង្កហានិភ័យគ្រោះទឹកជំនន់នៅក្នុងតំបន់ រួមទាំងទីក្រុងហូជីមិញផងដែរ។

ក្រុមហ៊ុន​វារីអគ្គិសនី Tri An ក្នុង​ខេត្ត Dong Nai ដែល​ស្ថិតនៅជាប់​​ទីក្រុង ហូជីមិញ បាន​ប្រកាស​ថា ដោយសារតែកម្ពស់ទឹកក្នុងអាង បានឡើងដល់៦០.៤ម៉ែត្រ ក្បែរកម្រិតគ្រោះថ្នាក់ហើយនោះ, ដូច្នេះទំនប់នេះនឹងបើកបញ្ចេញទឹក ១ ០០០ ម៉ែត្រ​គូប​ក្នុង​មួយ​វិនាទី ដើម្បីធ្វើឲ្យស្ថានភាពធូរស្រាល។

មុនសេចក្តីប្រកាសនេះ, ស្ថានីយ៍ឧតុនិយមនិងជលសាស្ត្រខេត្ត Dong Nai បានចេញការព្រមាន អំពីកម្រិតទឹកទន្លេហក់ឡើងខ្លាំង ជាហេតុបង្កហានិភ័យគ្រោះទឹកជំនន់និងបំណាក់ដី វាយប្រហារតំបន់នៅតាមដងទន្លេ និងខេត្ត Binh Duong ក៏ដូចជាទីក្រុងហូជីមិញផងដែរ។

លោក Nguyen Phuoc Huy នាយក​ស្ថានីយ​ឧតុនិយម​បាន​កត់​សម្គាល់​ថា ស្ថានភាព​ទឹកទន្លេកំពុងធ្ងន់ធ្ងរ​ដោយសារ​ភ្លៀង​ធ្លាក់​ខ្លាំង​នៅ​តំបន់​ខាង​លើ។ ប្រជាពលរដ្ឋនិងអាជ្ញាធរមូលដ្ឋានត្រូវតាមដានការវិវត្តនៃអាកាសធាតុឲ្យបានដិតដល់បំផុត ដើម្បីត្រៀមខ្លួនទប់ទល់នឹងគ្រោះមហន្តរាយណាមួយដែលអាចកើតឡើងជាយថាហេតុ។

សូមបញ្ជាក់ថា ទំនប់វារីអគ្គិសនី Tri An លាតសន្ធឹងលើផ្ទៃដីទំហំ៣២៣គីឡូម៉ែត្រការ៉េ នៅក្នុងអាងទន្លេ Dong Nai ហើយត្រូវប្រើប្រាស់ដើម្បីបង្កើតថាមពល ធានាការផ្គត់ផ្គង់ទឹកសម្រាប់ប្រើប្រាស់ក្នុងស្រុកនិងកសិកម្ម និងគ្រប់គ្រងទឹកជំនន់នៅតំបន់ខាងក្រោម៕

អត្ថបទ៖ សុខ សុវណ្ណ

ចុចអាន៖ ឡាវ បើកទំនប់ទឹកនៅខេត្ត Savannakhet