ណាតូ ព្រមានកូរ៉េខាងជើង ឯកូរ៉េខាងត្បូង ក៏គំរាមបញ្ជូនទ័ព ទៅជួយអ៊ុយក្រែន ដូចគ្នា

ត្បិតតែមិនទាន់ច្បាស់ថាតើកូរ៉េខាងជើង ពិតជាបញ្ជូនទាហានទៅជួយរុស្ស៊ីប្រយុទ្ធជាមួយអ៊ុយក្រែន មែនឬអត់ក៏ដោយ ប៉ុន្តែប្រមុខអង្គការណាតូលោក Mark Rutte បានព្រមានចេញពីប្រទេសអេស្តូនីថា បើទីក្រុងព្យុងយ៉ាង សម្រេចចិត្តធ្វើរឿងនេះមែន វានឹងក្លាយការដុតកម្តៅជម្លោះឲ្យកាន់តែរោលរាល ហើយរឿងនេះពិតជាសំខាន់ណាស់ ត្រូវគិតគូរឲ្យមែនទែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំជាមួយសមាជិកនៃសម្ព័ន្ធភាពយោធាដឹកនាំដោយសហរដ្ឋអាមេរិក កាលពីថ្ងៃអង្គារទី២២ខែតុលាឆ្នាំ២០២៤​ លោក Rutte ព្រមានថា «បើកូរ៉េខាងជើង ពិតជាបញ្ជូនទាហានទៅអ៊ុយក្រែនមែន នោះជម្លោះនឹងកាន់តែរីកធំនិងគ្រោះថ្នាក់ខ្លាំងបំផុត»។

ស្របពេលជាមួយគ្នានោះ ប្រទេសកូរ៉េខាងត្បូង ក៏បានចេញមុខគំរាមផងដែរ ដោយបើយោងតាមសារព័ត៌មាន Yonhap ដែលដកស្រង់សម្តីមន្ត្រីជាន់ខ្ពស់កូរ៉េខាងត្បូងបានផ្សាយថា ខ្លួននឹងផ្តល់ជំនួយសព្វាវុធនិងបញ្ជូនទាហានទៅជួយកងកម្លាំងរបស់ប្រមុខរដ្ឋាភិបាលទីក្រុងកៀវ វ្ល៉ាឌីមៀរ ហ្សេលេនស្គី ដូចគ្នា បើរឿងកូរ៉េខាងជើង បញ្ជូនទ័ពទៅជួយលោក ពូទីន គឺជាការពិត។

ដោយឡែក ក្នុងសេចក្តីថ្លែងការណ៍មួយ ក្រុមប្រឹក្សាសន្តិសុខជាតិកូរ៉េខាងត្បូង បានអំពាវនាវឲ្យកូរ៉េខាងជើង ដកទ័ពចេញពីប្រទេសរុស្ស៊ីជាបន្ទាន់ ហើយថែមទាំងគំរាមចាត់វិធានការតបតយ៉ាងសមស្របទៀតផង។

នេះជាសារ​ព្រមាន​ដ៏ខ្លាំងបំផុតមួយ ដែលកូរ៉េខាងត្បូងកម្របញ្ចេញណាស់ ខណៈ​ខ្លួន​បារម្ភបំផុតចំពោះការលូកដៃកាន់តែជ្រៅរបស់កូរ៉េខាងជើង ចូលទៅក្នុងសង្គ្រាមរុស្ស៊ី-អ៊ុយក្រែន។

កាលពីថ្ងៃសុក្រសប្តាហ៍មុន ចារកម្មទីក្រុងសេអ៊ូលទម្លាយថា កូរ៉េខាងជើងបានសម្រេចចិត្តបញ្ជូនទាហានទ្រង់ទ្រាយធំ ទៅជួយដល់សង្គ្រាមរបស់ទីក្រុងមូស្គូក្នុងប្រទេសអ៊ុយក្រែន ខណៈមានទ័ពពិសេសចំនួន១ ៥០០នាក់រួចហើយ កំពុងទទួលការបណ្តុះបណ្តាលនិងឈរជើងនៅក្នុងតំបន់ចុងបូព៌ារបស់រុស្ស៊ី ​ហើយជាចុងក្រោយ កូរ៉េខាងជើងអាចបញ្ជូនទាហានសរុបដល់ទៅ ១២ ០០០នាក់ឯណោះ៕

អត្ថបទ៖ សុខ សុវណ្ណ

ចុចអាន៖ អាមេរិក បារម្ភខ្លាំង រឿងកូរ៉េខាងជើង បញ្ជូនទាហានទៅជួយរុស្ស៊ី ប្រយុទ្ធជាមួយអ៊ុយក្រែន