ព័ត៌មានអន្ដរជាតិ

ជប៉ុន ប្រាប់ថា ទ័ពកូរ៉េខាងជើងនៅរុស្ស៊ីគឺជា «ក្ដីព្រួយបារម្ភធំ»

បានផុស

២ years មុន

នៅ

ថ្ងៃសុក្រ ២៥ តុលា ២០២៤

ដោយ

Chheang

វត្តមានរបស់ទាហានកូរ៉េខាងជើងនៅលើទឹកដីរុស្ស៊ី គឺជាក្ដីកង្វល់ដ៏ធំរបស់រដ្ឋាភិបាលជប៉ុន។ នេះបើយោងតាមការលើកឡើងរបស់លោក Yoshimasa Hayashi ប្រធានគណៈរដ្ឋមន្ត្រីជប៉ុន នៅថ្ងៃសុក្រទី២៥ខែតុលាឆ្នាំ២០២៤។

លោក Hayashi បាននិយាយថា៖ «រដ្ឋាភិបាលជប៉ុន កំពុងឃ្លាំមើលការដាក់ពង្រាយទាហានដោយកូរ៉េខាងជើងទៅកាន់រុស្ស៊ី ជាមួយក្ដីបារម្ភជាខ្លាំង រួមទាំងលទ្ធភាពដែលថា ពួកគេអាចចូលរួមក្នុងការលុកលុយរបស់រុស្ស៊ីប្រឆាំងអ៊ុយក្រែន»។

លោក Hayashi បានបន្តថា ការអភិវឌ្ឍទំនាក់ទំនងថ្មីចុងក្រោយនេះរវាងក្រុងព្យុងយ៉ាង និងក្រុងមូស្គូ មិនត្រឹមតែធ្វើឲ្យស្ថានភាពនៅអ៊ុយក្រែនកាន់តែយ៉ាប់យឺននោះទេ វាថែមទាំងធ្វើឲ្យកើតមានការព្រួយបារម្ភជាខ្លាំងដែលនឹងផ្ដល់ផលប៉ះពាល់ដល់សន្ដិសុខក្នុងតំបន់ជុំវិញប្រទេសជប៉ុនផងដែរ។ លោក បានរៀបរាប់ទៀតថា៖ «ជប៉ុននឹងបន្តប្រមូល និងវិភាគព័ត៌មានពាក់ព័ន្ធ និងបន្តធ្វើការជាមួយសហគមន៍អន្តរជាតិ សម្រាប់ការអនុវត្តពេញលេញនៃសេចក្ដីសម្រេចរបស់ក្រុមប្រឹក្សាសន្តិសុខដែលពាក់ព័ន្ធ និងសម្រេចបាននូវសន្ដិភាពដ៏យូរអង្វែង និងត្រឹមត្រូវនៅក្នុងប្រទេសអ៊ុយក្រែនឲ្យឆាប់រហ័សតាមដែលអាចធ្វើទៅបាន»។

មន្ត្រីជាន់ខ្ពស់ជប៉ុនរូបនេះ បានបញ្ជាក់ថា ការឈ្លានពានរបស់រុស្ស៊ីនៅអ៊ុយក្រែន គឺជាសកម្មភាពដ៏ឃោរឃៅ ដែលអង្រួនមូលដ្ឋាននៃសណ្ដាប់ធ្នាប់អន្តរជាតិ។

សូមបញ្ជាក់ថា ភ្នាក់ងារចារកម្មកូរ៉េខាងត្បូង បាននិយាយថា ទាហានកូរ៉េខាងជើងប្រមាណ ៣ ០០០នាក់កំពុងមានវត្តមាននៅលើទឹកដីរុស្ស៊ីសម្រាប់ការហ្វឹកហាត់ ដែលទំនងជាត្រូវដាក់ពង្រាយទៅកាន់ជួរមុខដើម្បីធ្វើសង្គ្រាមជាមួយអ៊ុយក្រែនឆាប់ៗនេះ។ កូរ៉េខាងត្បូង បានបន្ថែមថា កូរ៉េខាងជើងអាចបញ្ជូនទ័ពរាប់ពាន់នាក់ជាបន្តបន្ទាប់ទៀតទៅឲ្យក្រុងមូស្គូរហូតដល់ខែធ្នូខាងមុខ៕

ដោយ៖ ឈាង

ចុចអាន៖ លោក ពូទីន មិនបដិសេធរបាយការណ៍អាមេរិកអំពីការបញ្ជូនទ័ពកូរ៉េខាងជើង