បៃដិន-ហារីស សុទ្ធតែទូរស័ព្ទទៅ ត្រាំ ដើម្បីអបអរ និងអញ្ជើញមកសេតវិមាន ដើម្បីពិភាក្សាការផ្ទេរអំណាច

មេដឹកនាំពិភពលោកជាច្រើនបានសាទរចំពោះការជាប់ឆ្នោតរបស់លោក ដូណាល់ ត្រាំ ក្នុងនាមជាប្រធានាធិបតីសហរដ្ឋអាមេរិកទី៤៧ ហើយសូម្បីតែបេក្ខជនប្រកួតប្រជែងខាងគណបក្សប្រជាធិបតេយ្យអ្នកស្រី កាម៉ាឡា ហារីស និងប្រធានាធិបតីកាន់តំណែង ចូ បៃដិន ក៏បានទូរស័ព្ទទៅអបអរអ្នកសាធារណរដ្ឋរូបនេះផងដែរ ថែមទាំងអញ្ជើញមកសេតវិមាន ដើម្បីពិភាក្សាគ្នាអំពីការផ្ទេរអំណាចទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ RT នៅថ្ងៃព្រហស្បតិ៍ទី៧ខែវិច្ឆិកាឆ្នាំ២០២៤, លោកស្រី ហារីស បានទូរស័ព្ទទៅលោក ត្រាំ ដើម្បីទទួលស្គាល់លទ្ធផលឆ្នោតនិងអបអរជ័យជម្នះ ហើយពិភាក្សាអំពីការផ្ទេរអំណាចដោយសន្តិវិធី។

ចំណែកលោក បៃដិន ឯណោះ ក៏បានប្រកាសពីកិច្ចសហប្រតិបត្តិការជាមួយក្រុមរបស់លោក ត្រាំ ដើម្បីរៀបចំការផ្ទេរអំណាចឲ្យបានរលូនក្នុងរយៈពេលដ៏ខ្លីខាងមុខផងដែរ ហើយលោក ត្រៀមថ្លែងសុន្ទរកថាទៅកាន់ជនរួមជាតិអំពីលទ្ធផលឆ្នោតនៅប៉ុន្មានថ្ងៃទៀត។

សូមបញ្ជាក់ថា ក្រោយឈ្នះឆ្នោត លោក ដូណាល់ ត្រាំ បានក្លាយជាប្រធានាធិបតីអាមេរិកទី២ក្នុងប្រវត្តិសាស្រ្តដែលឈ្នះឆ្នោតពីរអាណត្តិប៉ុន្តែមិនជាប់គ្នា បន្ទាប់ពីលោក Grover Cleveland ឈ្នះបែបនេះដែរ ក្នុងឆ្នាំ១៨៩២។

រម្លឹកទៅឆ្នាំ២០១៦ លោក ត្រាំ បានជាប់ឆ្នោតជាប្រធានាធិបតីលើកដំបូង ក្រោយផ្តួលអតីតរដ្ឋមន្ត្រីការបរទេសអ្នកស្រី ហ៊ីលឡារី គ្លីនតុន និងប្តេជ្ញា ធ្វើឲ្យអាមេរិកអស្ចារ្យម្តងទៀត។ យ៉ាងណា គាត់បានចាញ់ការបោះឆ្នោតអាណត្តិថ្មីក្រោមថ្វីដៃលោកប្រធានាធិបតី ចូ បៃដិន នៅឆ្នាំ២០២០ ក្នុងអំឡុងពេលជំងឺរាតត្បាតកូវីដ១៩ វាយលុកពិភពលោក។

ទីបំផុត លោក ត្រាំ បានប្រកាសឈរឈ្មោះបោះឆ្នោតប្រធានាធិបតីសាជាថ្មីនៅថ្ងៃទី១៥ខែវិច្ឆិកាឆ្នាំ២០២២ ពោលគឺត្រឹមប៉ុន្មានថ្ងៃប៉ុណ្ណោះ បន្ទាប់ពីការបោះឆ្នោតពាក់កណ្តាលអាណត្តិ។

ក្នុងយុទ្ធនាការឃោសនាបោះឆ្នោតអាណត្តិទី២នេះ លោក ត្រាំ បានវាយប្រហារខ្លាំងទៅលើរដ្ឋបាលរបស់លោកបៃដិននិងអ្នកស្រីហារីស ហើយចង្អុលចំៗ ទៅលើគោលនយោបាយដ៏អន់ខ្សោយ ដែលជាហេតុផលនៅពីក្រោយធ្វើឲ្យអតិផរណាហក់ឡើង និងវិបត្តិព្រំដែនអាមេរិកកាន់តែអាក្រក់ទៅៗ៕

អត្ថបទ៖ សុខ សុវណ្ណ

ចុចអាន៖ មេដឹកនាំបរទេស២រូប អបអរលោក ត្រាំ មុនគេ ក្រោយជាប់ឆ្នោត