ស្ងាត់ៗ រុស្ស៊ីសម្ដែងការព្រួយបារម្ភអំពីស្ថានភាពហិង្សានៅក្នុងប្រទេសមីយ៉ាន់ម៉ា

មន្រ្តីរដ្ឋាភិបាលម្នាក់បាននិយាយនៅថ្ងៃសុក្រនេះថា ប្រទេសរុស្ស៊ីបានចាត់ទុកស្ថានការណ៍នៅក្នុងប្រទេសមីយ៉ាន់ម៉ាថា “គួរឲ្យព្រួយបារម្ភ” និងកំពុងតាមដានយ៉ាងដិតដល់ ។

អ្នកនាំពាក្យនៃវិមានក្រឹមឡាំងលោក Dmitry Peskov បានប្រាប់អ្នកយកព័ត៌មាននៅទីក្រុងម៉ូស្គូថា របាយការណ៍អំពីការកើនឡើងនៃចំនួនអ្នកស្លាប់ និងរបួសក្នុងចំណោមជនស៊ីវិលគឺមានការព្រួយបារម្ភជាពិសេស ។

លោកបាននិយាយថា “យើងកំពុងវាយតម្លៃស្ថានការណ៍គួរឲ្យភ័យខ្លាច ហើយយើងមានការព្រួយបារម្ភអំពីព័ត៌មានដែលបានមកពីទីនោះអំពីការកើនឡើងនៃចំនួនជនស៊ីវិលដែលស្លាប់ និងរងរបួស ។ នេះជាបញ្ហាគួរ ឲ្យ បារម្ភសម្រាប់យើង។ នេះជាបញ្ហាគួរឲ្យព្រួយបារម្ភសម្រាប់យើង ។ យើងកំពុងតាមដានយ៉ាងដិតដល់នូវអ្វីដែលកំពុងកើតឡើងនៅទីនោះ” ។

លោក Peskov បាននិយាយថា អាជ្ញាធររុស្ស៊ីក៏កំពុងថ្លឹងថ្លែងលទ្ធភាពនៃការផ្អាកកិច្ចសហប្រតិបត្តិការយោធាជាមួយមីយ៉ាន់ម៉ាផងដែរ ។

យោធាបានសម្លាប់មនុស្សយ៉ាងតិចណាស់ចំនួន ៧០ នាក់ និងបានចាប់ឃុំខ្លួនមនុស្សជាង ២,០០០ នាក់ក្នុងពេលមានបាតុកម្មទ្រង់ទ្រាយធំប្រឆាំងនឹងរដ្ឋប្រហារថ្ងៃទី ១ ខែកុម្ភៈ ។

មេដឹកនាំនយោបាយកំពូលៗរួមទាំងទីប្រឹក្សារដ្ឋលោកស្រី អ៊ុងសាន ស៊ូជី និងលោកប្រធានាធិបតី Win Myint ក៏ស្ថិតក្នុងការឃុំឃាំងរបស់យោធាផងដែរ ។

អង្គការពិភពលោករួមទាំងអង្គការសហប្រជាជាតិ និងអង្គការឃ្លាំមើលសិទ្ធិមនុស្សអន្តរជាតិបានថ្កោលទោសយ៉ាងខ្លាំងចំពោះអំពើហិង្សារបស់យោធា និងសម្តែងការព្រួយបារម្ភចំពោះឧក្រិដ្ឋកម្មប្រឆាំងនឹងមនុស្សជាតិជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ សម្ពាធ​​ស្ទើរ​​គ្រប់​ច្រក​ ពេល​​នេះ​ ADB​ ​ផ្អាក​​​មូលនិធិ​​​​អភិវឌ្ឍនៅ​​មីយ៉ាន់ម៉ា

ចុចអាន ៖ UN ៖ យោធាមីយ៉ាន់ម៉ាកំពុងប្រព្រឹត្តឧក្រិដ្ឋកម្មប្រឆាំងនឹងមនុស្សជាតិ​