កាន់តែក្តៅ! អឺរ៉ុប ៥ប្រទេស ប្រកាសរួមដៃគ្នាសម្រុកផ្តល់ជំនួយយោធាដល់ អ៊ុយក្រែន

ប្រទេសចំនួន៥នៅទ្វីបអឺរ៉ុប បានប្រកាសរួមដៃគ្នាសម្រុកផ្តល់ជំនួយយោធាដល់ទីក្រុងកៀវ ដែលទង្វើនេះត្រូវគេជឿថា នឹងធ្វើឲ្យសង្គ្រាមរុស្ស៊ី-អ៊ុយក្រែន កាន់តែរីកធំទៅៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Reuters​ កាលពីថ្ងៃចន្ទទី២៥ខែវិច្ឆិកាឆ្នាំ២០២៤, រដ្ឋមន្ត្រីការពារជាតិអាល្លឺម៉ង់លោក Boris Pistorius បានប្រាប់អ្នកសារព័ត៌មានក្នុងទីក្រុងបែរឡាំង ថា អាល្លឺម៉ង់ អង់គ្លេស អ៊ីតាលី និងប៉ូឡូញ បានពិភាក្សាគ្នារួចអស់ហើយអំពីការជួយពង្រឹងកម្លាំងទ័ពអ៊ុយក្រែន ដើម្បីទប់ទល់ជាមួយរុស្ស៊ី។

ជុំវិញបញ្ហានេះដែរ​រដ្ឋមន្ត្រីការពារជាតិប៉ូឡូញ Wladyslaw Kosiniak-Kamysz ក៏និយាយដែរថា «អឺរ៉ុបត្រូវតែខំប្រឹងបន្ថែមទៀត ហើយត្រូវតែធ្វើសកម្មភាពជាមួយគោលដៅធំ ដើម្បីក្លាយជាដៃគូដ៏ល្អសម្រាប់សហរដ្ឋអាមេរិក។ យើងត្រូវតែប្រឹងឲ្យខ្លាំងដើម្បីជួយអ៊ុយក្រែន»។

សេចក្តីប្រកាសនេះកើតឡើងស្របពេលមានរបាយការណ៍ថា ប្រទេសកូរ៉េខាងជើងឯណោះ ក៏បានផ្តល់​មីស៊ីល​ប៉ាលិស្ទិក​​ប្រហែល ១០០​គ្រាប់ដល់​រុស្ស៊ី ហើយថែមទាំងបញ្ជូនបុគ្គលិកយោធារបស់ខ្លួន ដើម្បីជួយប្រតិបត្តិការ និងថែទាំគ្រាប់​មីស៊ីល​ទាំង​នោះ​ផងដែរ។

ទីភ្នាក់ងារស៊ើបការណ៍សម្ងាត់ នៃក្រសួងការពារជាតិអ៊ុយក្រែន បាននិយាយថា មីស៊ីល​​ដែល​កូរ៉េខាងជើងផ្គត់ផ្គង់ ជា​ប្រភេទ​មីស៊ីលរយៈចម្ងាយខ្លី KN-23 និង KN-24 ហើយ​​មាន​សមត្ថភាព​អាច​បំពាក់​ក្បាល​គ្រាប់​នុយក្លេអ៊ែរ។

រឿងរ៉ាវទាំងនេះធ្វើឲ្យនឹកឃើញដល់ការអះអាងរបស់អ្នកជំនាញអន្តរជាតិមួយចំនួនដែលនិយាយថា ពិតណាស់! សង្គ្រាមលោកលើកទី៣ កំពុងកើតឡើងមែន ព្រោះក្រៅពីសម្ព័ន្ធមិត្តរុស្ស៊ីមកជួយកងកម្លាំងរបស់លោកពូទីនហើយនោះ ឯនៅខាងអ៊ុយក្រែន ក៏មានខ្នងបង្អែកលោកខាងលិច ជួយឥតឈប់ដូចគ្នា។ និយាយរួមទៅ វាបានក្លាយជាសង្គ្រាមមានការចូលដៃពីភាគីយ៉ាងច្រើន៕

អត្ថបទ៖ សុខ សុវណ្ណ

ចុចអាន៖ ចំណុចខ្លះៗ ដែលគេហ៊ានថា សង្គ្រាមលោកលើកទី៣ បានកើតឡើងហើយ