ក្រោយ​អាមេរិក​រឹតត្បិត​នាំ​ចេញ​បន្ទះឈីប ចិន​ហាម​នាំចេញសារធាតុរ៉ែ​គាំទ្រ​ឧស្សាហកម្ម​នេះ​

ប្រទេសចិន បានប្រកាសកាលពីថ្ងៃអង្គារថា ខ្លួន​​កំពុងហាមឃាត់ការនាំចេញនូវសារធាតុ Gallium, germanium, antimony និងសម្ភារៈបច្ចេកវិទ្យាខ្ពស់សំខាន់ៗផ្សេងទៀត ទៅកាន់សហរដ្ឋអាមេរិក​ជាការ​ឆ្លើយតបនឹងការដាក់ទណ្ឌកម្ម​របស់សហរដ្ឋអាមេរិកលើឧហ្សាហកម្មផលិតបន្ទះឈីបរបស់ចិន។

ក្រសួង​ពាណិជ្ជកម្មចិនបានប្រកាសពីការផ្លាស់ប្តូរនេះ បន្ទាប់ពីទីក្រុងវ៉ាស៊ីនតោនបានពបង្កើន​បញ្ជីឈ្មោះក្រុមហ៊ុនចិនរបស់ខ្លួនដែលស្ថិតនៅក្រោមការគ្រប់គ្រងលើការនាំចេញលើឧបករណ៍ផលិតបន្ទះឈីបកុំព្យូទ័រ កម្មវិធី និងបន្ទះឈីបអង្គចងចាំល្បឿនលឿនដែលត្រូវការសម្រាប់កម្មវិធីកម្រិតខ្ពស់។

ការដាក់ទណ្ឌកម្មលើការរឹតបន្តឹងពាណិជ្ជកម្មនេះក៏កើតឡើងនៅពេលដែលប្រធានាធិបតីជាប់ឆ្នោតលោក ដូ ណាល់ត្រាំ បាននឹងកំពុងគម្រាមដំឡើងពន្ធយ៉ាងខ្លាំងលើការនាំចូលពីប្រទេសចិន និងប្រទេសដទៃទៀត ដែលអាចធ្វើឱ្យមានភាពតានតឹងកាន់តែខ្លាំងឡើងជុំវិញពាណិជ្ជកម្ម និងបច្ចេកវិទ្យា។

ក្រសួងការបរទេស​ចិន​ក៏​បាន​ចេញ​សេចក្តី​ព្រមាន​យ៉ាង​ម៉ឺងម៉ាត់​ផងដែរ។ លោក Lin Jian អ្នកនាំពាក្យក្រសួងការបរទេសចិនបាននិយាយនៅក្នុងសន្និសីទសារព័ត៌មានមួយកាលពីថ្ងៃអង្គារថា «ប្រទេសចិនបានធ្វើការតវ៉ាយ៉ាងម៉ឺងម៉ាត់ជាមួយសហរដ្ឋអាមេរិកសម្រាប់ការធ្វើបច្ចុប្បន្នភាពរបស់ខ្លួននៃវិធានការត្រួតពិនិត្យការនាំចេញ បន្ទះឈីប ការដាក់ទណ្ឌកម្មប្រឆាំងនឹងក្រុមហ៊ុនចិន និងការគាបសង្កត់ដោយព្យាបាទចំពោះវឌ្ឍនភាពបច្ចេកវិទ្យារបស់ប្រទេសចិន»។

គួរបញ្ជាក់ថាសារធាតុរ៉ែដែលមានប្រភពនៅក្នុងប្រទេសចិនត្រូវបានប្រើប្រាស់នៅក្នុងបន្ទះឈីបកុំព្យូទ័រ រថយន្ត និងផលិតផលផ្សេងៗទៀត។ កាលពីខែសីហា ក្រសួងពាណិជ្ជកម្មចិនក៏បានដាក់ទណ្ឌកម្មលើការនាំចេញសារធាតុ Antimony ដែលប្រើប្រាស់ក្នុងផលិតផលជាច្រើនចាប់ពីអាគុយរហូតដល់អាវុធ។

រ៉ែបែបនេះត្រូវបានចាត់ទុកថាសំខាន់សម្រាប់សន្តិសុខជាតិ ខណៈប្រទេសចិនគឺជាអ្នកផលិតសារធាតុ Antimony ដ៏សំខាន់ ដែលត្រូវបានប្រើក្នុងការផលិតអាវុធនុយក្លេអ៊ែរ នេះបើយោងតាមរបាយការណ៍របស់គណៈកម្មការពាណិជ្ជកម្មអន្តរជាតិរបស់សហរដ្ឋអាមេរិកឆ្នាំ ២០២១។

ប្រទេសចិនគឺក៏ជាប្រភពដ៏ធំបំផុតរបស់ពិភពលោកនៃសារធាតុ Galium និង germanium ដែលត្រូវបានផលិតក្នុងបរិមាណតិចតួច ប៉ុន្តែត្រូវការសម្រាប់ផលិតបន្ទះឈីបកុំព្យូទ័រ សម្រាប់ទូរសព្ទចល័ត រថយន្ត និងផលិតផលផ្សេងទៀត ក៏ដូចជាបន្ទះស្រូបពន្លឺព្រះអាទិត្យ និងបច្ចេកវិទ្យាយោធា។

សហរដ្ឋអាមេរិកទទួលបានប្រហែលពាក់កណ្តាលនៃការផ្គត់ផ្គង់លោហៈ Galium និង germanium ដោយផ្ទាល់ពីប្រទេសចិន នេះបើយោងតាមការស្ទង់មតិភូគព្ភសាស្ត្ររបស់សហរដ្ឋអាមេរិក ខណៈប្រទេសចិនបាននាំចេញGalliumប្រហែល ២៣ តោនក្នុងឆ្នាំ ២០២២និងផលិតបានប្រហែល ៦០០ តោននៃសារធាតុ germanium ក្នុងមួយឆ្នាំ។

ការរឹតបន្តឹងការនាំចេញបានជះឥទ្ធិពលចម្រុះទៅលើតម្លៃសម្រាប់សារធាតុរ៉ែសំខាន់ៗទាំងនោះ ដោយតម្លៃរបស់ antimony កើនឡើងទ្វេដងនៅឆ្នាំនេះរហូតដល់ជាង ២៥០០០ដុល្លារក្នុងមួយតោន​រួបទាំងតម្លែរបស់សារធាតុមួយចំនួនក៏បានបានកើនឡើងផងដែរ៕

អត្ថបទ៖ ប៊ុន សុភាព