ព័ត៌មានអន្ដរជាតិ

សភាកូរ៉េខាងត្បូងបរាជ័យដកហូតអំណាចលោក Yoon ក្នុងសម័យប្រជុំលើកទី១ ប៉ុន្តែបក្សប្រឆាំងថា នឹងបញ្ចប់ចុងឆ្នាំនេះ

បានផុស

២ years មុន

នៅ

ថ្ងៃសៅរ៍ ៧ ធ្នូ ២០២៤

ដោយ

កិច្ចប្រជុំសភានៅថ្ងៃទី៧ខែធ្នូដែលប៉ងដកដំណែងលោក ប្រធានាធិបតី Yoon Suk Yeol ដែលប្រកាសដាក់ច្បាប់អាជ្ញាសឹកកាលពីយប់ថ្ងៃអង្គារទី៣ខែធ្នូ បានបរាជ័យក្នុងថ្ងៃដំបូង ដោយសារសមាជិកសភានៃគណបក្សអំណាចប្រជាជន (PPP) របស់លោក Yoon ធ្វើពហិការមិនចូលរួមបោះឆ្នោត ដោយចេញមកខាងក្រៅសាលប្រជុំមិនព្រមចូលទៅបោះឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំសភាកូរ៉េខាងត្បូងនៅថ្ងៃនេះបរាជ័យទាំងពីរករណី គឺទី១ ការប៉ុនប៉ងបង្កើតក្រុមប្រឹក្សាស៊ើបអង្កេតលើភរិយាប្រធានាធិបតី និង ករណី២ ការប៉ងដកដំណែងលោក Yoon Suk Yeol។

ការបរាជ័យទាំងពីរករណីនេះ ដោយសារសមាជិកសភាគណបក្សកាន់អំណាចរបស់លោក Yoon ដែលមាន១០៨សំឡេងមិនបានបោះឆ្នោតគំាទ្រ សេចក្តីស្នើច្បាប់របស់គណបក្សប្រជាធិបតេយ្យដែលមានសមាជិក១៩២សំឡេង និងត្រូវការតែ៨សំឡេងទៀតប៉ុណ្ណោះដើម្បីបង្រ្គប់កូរ៉ុម២ភាគ៣ ដើម្បីដកហូតអំណាចប្រធានាធិបតី។

យោងតាមភា្នក់ងាររបស់ BBC ដែលផ្សាយបន្តផ្ទាល់ ប្រធានរដ្ឋសភាកូរ៉េខាងត្បូង លោក Woo Won-shik បានប្រកាសថា កិច្ចប្រជុំសភានៅថ្ងៃនេះគ្រោងបិទបញ្ចប់នៅត្រឹមម៉ោងជិត១០ម៉ោងនៅទីក្រុងសេអ៊ូល ត្រូវម៉ោងជិត៨ម៉ោងនៅកម្ពុជា។ ម៉ោងនៅកម្ពុជានិងនៅកូរ៉េខាងត្បូងខុសគ្នា២ម៉ោង ដោយកូរ៉េដើរលឿងជាងកម្ពុជា២ម៉ោង។

រដ្ឋសភាកូរ៉េខាងត្បូងនឹងត្រូវប្រជុំបោះឆ្នោតលើច្បាប់ដកហូតអំណាចលោក Yoon Suk Yeol ជាថ្មីម្តងទៀតនៅថ្ងៃពុធសប្តាហ៍ក្រោយ។

សូមបញ្ជាក់ថា ពេលនេះសម្ព័ន្ធគណបក្សប្រជាធិបតេយ្យមានសមាជិក១៩២ ដោយត្រូវការតែ៨សំឡេងទៀតប៉ុណ្ណោះពីគណបក្សកាន់អំណាចដែលមាន១០៨សំឡេង។ គណបក្សកាន់អំណាច បានប្តូរជំហរមិនបោះឆ្នោតប្រឆាំងលោក Yoon វិញ ក្រោយប្រធានាធិបតីចេញមុខសុំទោសជាសាធារណៈនៅព្រឹកថ្ងៃសៅរ៍នេះ។

ប្រជាជនចូលរួមតវ៉ាទាមទារឲ្យដកដំណែងប្រធានាធិបតី លោក Yoon Suk Yeol ខ្លះហូរទឹកភ្នែក ខ្លះទៀតចូលទៅកាន់តែកៀកទ្វាររដ្ឋសភាដែលគ្រោងរារាំងសមាជិកសភានៃបក្សកាន់អំណាចមិនឲ្យចេញទៅក្រៅ។ ប្រជាជនអ្នកតវ៉ាខ្លះបានបំបែកគ្នា ពេលដឹងថា សភាបានបិទសម័យប្រជុំ។

ប្រធានគណបក្សប្រជាធិបតេយ្យ Lee Jae-myung បានថ្លែងទៅកាន់ក្រុមអ្នកតវ៉ាថា លោកសុំទោសចំពោះការមិនមានលទ្ធភាពនាំយកលទ្ធផលដែលចង់បាន ប៉ុន្តែលោកនឹងមិនបោះបង់នោះទេ ដោយប្តេជ្ញាដកហូតអំណាតប្រធានាធិបតី Yoon Suk Yeol ឲ្យបាន។

លោក Lee Jae-myung និយាយថា៖«យើងច្បាស់ណាស់ថា នឹងបណ្តេញលោក Yoon Suk Yeol ដែលនឹងក្លាយជាហានិភ័យដ៏អាក្រក់បំផុតចំពោះសាធារណៈរដ្ឋកូរ៉េ។ យើងច្បាស់ណាស់នឹងនាំយកប្រទេសនេះទៅកាន់ប្រក្រតីវិញ ត្រឹមថ្ងៃបុណ្យណូអែល និងចុងឆ្នាំនេះ និងប្រគល់អំណោយណូអែលនិងចុងឆ្នាំ»៕