ត្រាំ មិនអញ្ជើញ ហ្សេលេនស្គី ឲ្យចូលរួមពិធីស្បថចូលកាន់តំណែងឡើយ តែថា បើចង់មក ក៏មកចុះ!

ក្នុងសន្និសីទសារព័ត៌មានផ្លូវការលើកដំបូងចាប់តាំងពីឈ្នះឆ្នោតជាប្រធានាធិបតីអាមេរិកអាណត្តិថ្មី, លោក ដូណាល់ ត្រាំ ត្រូវបានអ្នកកាសែតសួរថាតើ លោកអញ្ជើញប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី ឲ្យចូលរួមក្នុងពិធីស្បថចូលកាន់តំណែងនៅខែក្រោយដែរឬក៏អត់? លោក ត្រាំ ឆ្លើយថា «អត់ទេ! ខ្ញុំមិនបានអញ្ជើញគាត់ឡើយ ប៉ុន្តែបើគាត់ចង់មកចូលរួម ក៏មកចុះមិនអីទេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ ត្រូវគេស្គាល់ថា ជាបុគ្គលដែលមិនសូវពេញចិត្តលោក ហ្សេលេនស្គី ឡើយ ហើយគាត់តែងតែប្រឆាំងចំពោះការផ្តល់ជំនួយរបស់រដ្ឋាភិបាលទីក្រុងវ៉ាស៊ីនតោន ទៅឲ្យអ៊ុយក្រែន ​ថែមទាំងធ្លាប់ប្រកាសថា រដ្ឋបាលអាមេរិកថ្មី នឹងកាត់ជំនួយដល់ទីក្រុងកៀវ ទៀតផង។

ពាក់ព័ន្ធការអញ្ជើញមេដឹកនាំពិភពលោកឲ្យចូលរួមក្នុងពិធីសម្ពោធចូលកាន់តំណែងនោះ មានប្រភពជាច្រើនលើកឡើងថា លោក ត្រាំ ក៏អញ្ជើញប្រធានាធិបតីចិន ស៊ី ជីនពីង ឲ្យចូលរួមដែរ ដែលសំណើនេះ ធ្វើឡើងភ្លាមៗក្រោយពេលអ្នកសាធារណរដ្ឋ ជាប់ឆ្នោតខែវិច្ឆិកា ប៉ុន្តែគេមិនច្បាស់ឡើយថាតើ លោក ស៊ី ព្រមចូលរួមដែរឬក៏អត់?

យ៉ាងណា តាមការចុះផ្សាយរបស់​ CBS, ឯកអគ្គរដ្ឋទូត​ចិន​ប្រចាំ​សហរដ្ឋអាមេរិក និង​ភរិយា​ ​នឹង​ចូលរួម​ក្នុង​ព្រឹត្តិការណ៍​នេះ។

ក្នុង​ចំណោម​មន្ត្រី​ផ្សេងទៀត​ដែល​ត្រូវ​បាន​អញ្ជើញ រួមមាន​ប្រធានាធិបតី​អាហ្សង់ទីន Javier Milei, នាយករដ្ឋមន្ត្រី​អ៊ីតាលី Giorgia Meloni និង​ប្រធានាធិបតីអែលសាល់វ៉ាឌ័រ Nayib Bukele។

សូមបញ្ជាក់ថា លោក ត្រាំ ដែលយកឈ្នះគូប្រជែងមកពីគណបក្សប្រជាធិបតេយ្យ អ្នកស្រី​ កាម៉ាឡា ហារីស កាលពីខែមុន នឹងស្បថចូលកាន់តំណែងជាប្រធានាធិបតីទី៤៧របស់សហរដ្ឋអាមេរិកជាផ្លូវការ នៅថ្ងៃទី២០ខែមករា​ ក្នុងពិធីសម្ពោធនៅវិមាន កាពីតូល ក្នុងទីក្រុង វ៉ាស៊ីនតោន ឌីស៊ី៕

អត្ថបទ៖ សុខ សុវណ្ណ

ចុចអាន៖ លោក ត្រាំ សន្យាមិនទុកអ៊ុយក្រែន ចោលឡើយ