ព័ត៌មានអន្ដរជាតិ

អ៊ីតាលី ប្រកាសបន្តជួយអ៊ុយក្រែន រហូតដល់ដំណាច់ឆ្នាំ២០២៥

បានផុស

២ years មុន

នៅ

ថ្ងៃអង្គារ ២៤ ធ្នូ ២០២៤

ដោយ

Chheang

អ៊ុយក្រែន នឹងបន្តទទួលបានការផ្គត់ផ្គង់នូវជំនួយយោធាបន្ថែមទៀតពីប្រទេសអ៊ីតាលី ដើម្បីធ្វើសង្គ្រាមប្រឆាំងនឹងការឈ្លានពានពីរុស្ស៊ី រហូតដល់ដំណាច់ឆ្នាំ២០២៥។ នេះបើយោងតាមសេចក្ដីថ្លែងការណ៍របស់គណៈរដ្ឋមន្ត្រីអ៊ីតាលី កាលពីថ្ងៃចន្ទទី២៣ខែធ្នូឆ្នាំ២០២៤។

លោកស្រី Giorgia Meloni និងលោក Volodymyr Zelensky (រូបភាព៖ រដ្ឋាភិបាលអ៊ីតាលី)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីរុស្ស៊ីបានឈ្លានពានអ៊ុយក្រែនក្នុងខែកុម្ភៈឆ្នាំ២០២២ អ៊ីតាលីបានអនុម័តកញ្ចប់ជំនួយយោធាចំនួន១០លើក សម្រាប់រដ្ឋាភិបាលរបស់ប្រធានាធិបតីអ៊ុយក្រែន លោក Volodymyr Zelensky ក្នុងនោះមានទាំងប្រព័ន្ធការពារដែនអាកាស SAMP/T ចំនួន២គ្រឿង។

នាយករដ្ឋមន្ត្រីអ៊ីតាលី លោកស្រី Giorgia Meloni គឺជាអ្នកគាំទ្រទីក្រុងកៀវ ចាប់តាំងពីចូលកាន់តំណែងនៅចុងឆ្នាំ២០២២ ហើយបានប្តេជ្ញាគាំទ្រអ៊ុយក្រែនរហូតដល់សង្រ្គាមបញ្ចប់ ខណៈមានភាពមិនច្បាស់លាស់អំពីអាកប្បកិរិយានាពេលអនាគតរបស់សហរដ្ឋអាមេរិក នៅពេលដែលប្រធានាធិបតីទើបជាប់ឆ្នោត លោក ដូណាល់ ត្រាំ ចូលកាន់តំណែងក្នុងខែមករាខាងមុខ។

កាលពីថ្ងៃអង្គារ ប្រធានអង្គការណាតូ លោក Mark Rutte បានជំរុញឲ្យសមាជិកនៃសម្ព័ន្ធមិត្តយោធាបង្កើនជំនួយដល់អ៊ុយក្រែន ដើម្បីពង្រឹងជំហររបស់ខ្លួន សម្រាប់ចូលទៅអង្គុយតុចរចាសន្តិភាពជាមួយរុស្ស៊ី។

នៅក្រោមអាណត្តិដឹកនាំរបស់ប្រទេសអ៊ីតាលីនៅឆ្នាំនេះ ក្រុមប្រទេសប្រជាធិបតេយ្យធំៗទាំង៧ (G7) បានសន្យាម្តងហើយម្តងទៀតនូវការគាំទ្រសម្រាប់អ៊ុយក្រែន ថ្កោលទោសសង្រ្គាមឈ្លានពានរបស់រុស្ស៊ី និងបានសន្យាផ្តល់ប្រាក់កម្ចីចំនួន ៥០ពាន់លានដុល្លារសម្រាប់ទីក្រុងកៀវ ដោយប្រើទ្រព្យសម្បត្តិរបស់រុស្ស៊ីដែលត្រូវបានបង្កក៕

ដោយ៖ ឈាង